پکتیا ولایتی‌نینگ زرمت تومنیده 4 ییل‌دن بویان یاپیق قالگن قیزلرگه تیگیشلی 13 مکتب قیته‌دن آچیلیشی توغریسیده سعی و حرکت‌لر دوام ایتیب کیلماقده و طالب‌لر بو مکتب‌لر قیته‌دن آچیلیشی توغریسیده توسیق بولمس‌لری توغریسیده سوز بیرگن، بیراق مذکور مکتب‌لرنینگ ایشیگی حاضرگه‌قدر آچیلمه‌گن.
پکتیا حاکمی شمیم‌خان کتوازی‌نینگ ایتیشیچه، قوم بویوک‌لری‌نینگ واسطه‌چیلیگی بیلن طالب‌لر ارا سوزلشوولر دوام ایتماقده و مکتب‌لرنینگ یاپیق قالیشی و اولرنینگ قیته‌دن آچیلیشی توغریسیده تیزلیک‌ده اقدام بولیشی کیره‌ک.
پکتیا ولایت کینگشی اعضاسی حفیظ‌الله مبارز‌نینگ ایتیشیچه، یالغوز زرمت تومنی‌نینگ مکتب‌لری یاپیق ایمس، بلکیم باشقه تومن‌لرده مکتب‌لردن بیرقطاری اوقووچیلرنینگ یوزیگه یاپیق قالگن.
زرمت تومنی‌نینگ معارف باشلیغی کوچی زازی‌نینگ ایتیشیچه، مذکور تومنده عیال اوقیتووچیلر بولمه‌گنی سبب، مکتب‌لرنینگ ایشیگی قیزلرنینگ یوزیگه یاپیق قالگن. اونینگ ایتیشیچه، اوقیتووچیلرنینگ بو تومن‌لرده تعلیمات بیریش‌گه علاقه‌سی یوق دیر.
طالبان گروهی‌نینگ سوزلاوچیسی ذبیح‌الله مجاهد، پکتیا ولایتیده عیال اوقیتووچی بولمه‌گنی باعث، مکتب‌لر یاپیق قالیب و اوشبو قیین‌چلیک‌نی حل قیلیش اوچون سعی و حرکت دوام ایته‌یاتگنینی بیلدیرگن. اونینگ ایتیشیچه، معارف مسؤوللری و باشقه اداره‌لر تامانیدن مذکور ولایت‌ده عیال اوقیتووچیلر تعیین ایتیلیشی کیره‌ک.
زرمت، پکتیا ولایتی‌نینگ جمعیت‌لی تومنلریدن بیری دیر. مذکور تومنده 63 مکتب موجود و اولردن یریمی‌نینگ بِناسی یوق دیر.
