پکتیا ولایتی معارف اداره‌سی نینگ مسووللری، ولایتده کانتینرلر ایچیدن 90مینگ جلد درسلیک کتاب قولگه کیریتگن لیکلری حقیده خبر بیردیلر. کته مقدارده‌گی مذکور درسلیک کتابلر تورت ییلدن بیری کانتینرلرده یاشیریلگن حالده سقلب کیلینگن لیگینی ایته‌دی معارف رسمیلری.
ولایت نینگ معارف ریاستینی وقتینچه‌لیک باشقره‌دیگن سرپرست لقمان حکیم حکیمی، مینگلب اوقووچی اوشبو تورت ییل جریانینی کتاب تنقیسلیگی بیلن روپه ره بولیب، مکتبلرده درس اوقیگنلر دیگن.
بو ایش اوچون ولایت سابق معارف اداره‌سی مسووللرینی تفاوت‌سیزلیککه عیبدار بیلگن جناب حکیمی، معارف ریاستیده فسادگه قرشی کوره‌شیشی خصوصیده تاکید قیلگن.
اوتگن ایکّی آی ایچیده 22مینگ خیالی اوقووچی انیق‌لنگن لیگینی بیلدیرگن معارف ریاستی نینگ سرپرستی، مسلکی اوقیتووچیلر بولمه‌گن‌لیگی باعث طلبه‌لر یوزیگه یاپیب قوییلگن ییتی مکتب قیته‌دن آچیلگن لیگینی تیلگه آلگن.
پکتیا ولایتی نینگ ولایت کینگشی اعضاسی ممتاز کرخیل، ولایتده مینگلب کتابنی یاشیریب اوقووچیلرگه ترقتمس‌لیک معارف تیزیمی اوچون چده‌ب بولمی دیگن بیر ضربه دیگن.
کته مقدارده‌گی اوشبو کتابلر ولایت نینگ مینگلب اوقووچیسی هر ییل کتاب‌سیزلیکدن بار- بار شکایت قیلگن بیر پیتده کانتینرلردن قولگه کیریتیلماقده.
پکتیا معارف اداره‌سی نینگ رسمی حساباتیده، حاضر ولایت بویلب 355مکتب فعال بویلب، چمه‌سی 165مینگ قیز و ایرکک طلبه درس بیلن شغلله‌نیشی قید ایتیلگن.
