بدخشان ولایتیده کرونا ویروسی نینگ علامتی بولگن کیشی خودکشلیک قیلگن. مذکور کیشینینگ عایلهسی، او ینگیلیکده ایراندن قیتگنی و وجودی ده کرونا ویروسی نینگ جدی علامتی بولگنینی ایتگن.
اوشبو کیشینی عایلهسی نینگ ایشانچی گه کوره، او، بدخشان ولایتی کسلخانهسی نینگ داکترلری و ساغلیک مسؤوللرینی دقتسیزلیکلری باعث، خودکشلیک قیلگن؛ بیراق بدخشان ولایتی کسلخانهسی مسؤوللری نینگ ایتیشلریچه، بو کیشی بنگی بولگنی اوچون روحی وضعیتی یامانلیگیدن درد چیکر ایکن.
مذکور کیشینی آتهسی نینگ ایتیشیچه، اوغلی نینگ وجودی ده کرونا ویروسی نینگ علامتینی سیزگن ده اونی کسلخانه گه آلیب باریب و قرنطین قیلگن. بو کیشی نینگ آتهسی گه کوره، کسل باشینی آکسیجن بالونی و دیوارگه اورگن و قان آققنی باعث، جان بیرگن.
اونگه کوره، بدخشانده کرونا ویروسی نینگ کسللریگه خاص کسلخانه نینگ بو ویروس گه چلینگنلر و شبههلی کیشیلرنی دارولش گه ییترلیچه ساغلیک امکانیتی یوق دیر و شو یوزهدن قرنطین بولگنلرنینگ کونی یخشی اوتمهیدی.
بدخشان ولایتی بوییچه ساغلیقنی سقلش ریاست باشلیغی نور خاوری نینگ سلاموطندارگه ایتیشیچه، کرونا ویروسی گه شبههلی کیشی یامان روحی وضعیت بیلن کسلخانه گه آلیب کیلینگن ایکن و نتیجهده خودکشلیک قیلگن.
اونینگ ایتیشیچه، بدخشان ولایتی بوییچه کرونا ویروسی گه خاص کسلخانهنینگ داکترلری بو کیشینی دارولش خصوصیده، هیچ بیر شکلده بیفرق یاندهشمهگنلر و موجود بولگن بوتون امکانیت بیلن اوندن مراقبت قیلیشگن.
مذکور کیشی نینگ یقینلریدن بیری نی ایتیشیچه، بدخشان ولایتی بوییچه ساغلیقنی سقلش ریاستی حاضرگهقدر اونی کومیش گه رخصت بیرمهگن.
اونگه کوره، بدخشان ولایتی بوییچه ساغلیقنی سقلش ریاستی، بو کیشی نینگ سیناوینی نتیجهسی کابلدن کیلگونگهقدر کومیش گه رخصت بیرمهسینی ایتگن.
بدخشان ولایتی نینگ یشاوچیلری، اوشبو ولایتده کرونا ویروسی گه چلینگن کسللرگه خاص مرکز وضعیتیدن خواطر بیلدیریب ایتیشلریچه، بو ولایتده کرونا ویروسی جدی شکلده رواجلنگن صورتده، کوپینچه کیشیلر اولیشی ممکن.
بوگون «دوشنبه، 18- حمل» ایرتهلب مملکت بوییچه ساغلیقنی سقلش وزیرلیگی نینگ اعلان قیلیشیچه، کرونا ویروسی گه چلینگنلرنینگ رقمی 367 کیشی گه ییتیشگن. ینگیلیک که کرونا ویروسی دن باشقه 30 ینگی واقعه هرات، کابل، قندوز، نیمروز و فاریاب ولایتلریده رویخط گه آلینگن. ساغلیقنی سقلش وزیرلیگی تامانیدن بیریلگن گزارش گه کوره، حاضرگچه اوشبو ویروس گه چلینگنلردن 13 تهسی جان بیرگن.
