د افغانستان ختیځ کونړ ولایت د ښځو چارو ریاست چارواکي وایي، په دغه ولایت کې د امن خونو نشتوالي له امله له تاوتریخوالو سره مخ شوې ښځې د ځینو مخورو کسانو په کورونو کې ساتل کيږي.
دغه چارواکي زیاتوي، په دغه ولایت کې له ګواښ سره مخ ښځو خوندیتوب له پاره د امن خونې ته جدي اړتیا ده.
د کونړ د ښځو چارو رییسې سهیلا بابر سلام وطندار ته وویل، کله چې له تاوتریخوالو سره مخ شوې ښځې له کوره وتښتي او یا هم د وهلو کومه قضیه وي، نو دوی ریاست ته د مراجعه کولو وروسته خوندي نه وي.
د هغې پر خبره، د یاد ولایت قوماندانۍ يې هم د دوی له ساتلو اوږه خالي کوي.
نوموړې دا هم ویلي، تر دې مهاله د تاوتریخوالي پېښو قرباني مېرمنې د ځینو باوري کسانو په کورونو کې ساتل کېږي، چې دوی یې د خوندیتوب ډاډ نه شي ورکولی.
په همدې حال کې د کونړ والي وحیدالله کلیمزي سلام وطندار ته وویل، څو ځله یې حکومت او د ښځو چارو وزارت ته په کونړ کې د امن خونې جوړولو وړاندیزونه کړي؛ خو لا یې هم د جوړولو له پاره عملي ګام نه دی پورته شوی.
کلیمزی زیاتوي، اوس مهال د تاوتریخوالي قرباني ښځې د ننګرهار امن خونه کې ساتي.
د وحیدالله پر وینا، ننګرهار ته د متضررو ښځو په انتقالولو کې له سختو ستونزو سره مخ دي.
له خطر سره مخ ښځو له پاره د امن خونو رامنځته کیدل په افغانستان کې نوې ښکارنده ده، چې ځینې کسان کله ناکله نیوکې هم پرکوي، خو ډیر کسان بیا دا ډول خونې اړینې بولي او د جوړیدو غوښتنه یې کوي.
