د کندوز ولایتي ادارې شاوخوا ۷ میاشتې مخکې د دې ولایت د علی اباد ولسوالۍ پر دولتي ځمکې د زورواکو له خوا شوي کورونه ویجاړ کړي وو.
خو اوس د دغې ولسوالۍ یو شمېر اوسېدونکي وایي، چې سیمه ییزو زورواکو بیاځلي د دغو کورونو په جوړولو شروع کړې.
دغه خپل سري کورونه په یو استوګنیز ښارګوټي کې جوړ شوي، چې تراوسه یې د وېش رسمي بهیر نه دی پیل شوی.
د علی اباد ولسوالۍ استوګن خال محمد سلام وطندار ته وویل، د دې ولسوالۍ په استوګنیز ښارګوټي کې کوم کورونه، چې د سیمه ییزو زورواکو له خوا د جوړولو کار پرې روان دی، یو ځل د حکومت له خوا ویجاړ شوي وو.
د سیف الله په نوم یو بل کندوزي وویل، سیمه ییز زورواکي د خلکو په ښارګوټي کې کورونه جوړوي. دی وايي، چې د کندوز سیمه ییز حکومت د کورونو د جوړېدو په مخنیوي کې جدي عمل نه کوي.
له بل لوري د کندوز والي اسدالله عمر خېل، د ویجاړو شویو کورونو د بېرته ودانولو خبر نه مني او وايي، که دا موضوع حقیقت وي، نو د علی اباد ولسوال او امنیه قوماندان به عدلي او قضايي بنسټونو ته وروپېژني.
په تېر کې د کندوز والي د خپل سرو کورونو د ویجاړولو پرمهال ویلي و، چې په دې ولایت کې به د ځمکو له غاصبینو سره جدي مبارزه کوي.
د کندوز ولایت د اراضي ادارې رییس محمد ابراهیم ترکمن د خلکو شکایت مني او وايي، چې تراوسه شاوخوا۵۰ سلنه ویجاړ شوي کورونه بېرته د سیمه ییزو زورواکو له خوا جوړ شوي دي او دوی نه شي کولی، چې د سیمه ییزو زورواکو مخنیوی وکړي.
د کندوز ولایت د اراضي ادارې د شمېرو له مخې په دې ولایت کې له ۸ زرو جریبه ډېره دولتي ځمکه د زورواکو له خوا غصب شوې ده.
