په کابل کې د کلیوالي صنایعو ستر نندارتون پرانستل شو

د کلیوالي صنایعو دغه ستر نندارتون نن (چهارشنبې) د کلیوالي صنایعو د پراختیا  ملي پروګرام له خوا جوړ شوی و.

په دې نندارتون کې له پنځو ولایتونو نږدې ۱۱۰ کلیوالو متشبثینو ګډون کړی وو او موخه یې د کلیوالو مېرمنو د عوایدو زیاتوالي تر څنګ هېوادوالو ته د کلیوالو مېرمنو په لاس جوړ شویو صنایعو او محصولاتو ور پېژندل دي.

د کلیوالي صنایعو د پراختیا ملي پروګرام د کلیو او پراختیا وزارت په اډانه کې کار کوي.

د نندارتون د پرانیستنې پر مهال د کلیو او پراختیا وزیر نصیر احمد دراني وویل، چې د کلیوالي پراختیا پروګرام له لارې یې په ۵ ولایتونو کې له پنځو زرو زیات د سپما ګروپونه او ۵ سوه د پورونو د ورکړې ټولنې جوړې کړي دي.

دراني وویل، چې د دې پروګرام موخه د کلیوالو مېرمنو اقتصادي وده، د سیمه ییزو تشبثاتو پیاوړتیا، د عوایدو لوړول او کلیوالو خلکو ته د کاري فرصتونو را منځته کول دي.

هغه وايي، چې د هرات، بلخ، بامیانو، پروان او ننګرهار ولایتونو کې د دغه پروګرام له لارې ۶۸ زره کاري زمینې په مستقیم او غیر مستقیم ډول د پنځو ولایتونو په ۲۷ ولسوالیو کې برابر شوی دی، چې ۶۴سلنه یې په کې مېرمنې په کارونو بوختې دي.

د کلیو او پراختیا وزیر وویل، چې د کلیوالي صنایعو نندارتون د دغه وزارت او خپله د کلیوالو له لوري په مالي مرسته جوړ شوی دی، چې د مېرمنو له پاره په مستقیم او غیر مستقیم ډول د کار زمینه برابروي.وزیر وویل، چې په دې نندارتون کې ۹۸۸ کوچیانو هم ګډون کړی دی، چې ۵۵سلنه یې مېرمنې دي.

د کلیو پراختیا ملي پروګرام په ۲۰۱۰ میلادي کال کې د کلیو او پراختیا وزارت په چوکاټ کې پیل شو، چې د ۶کلونو په موده کې یې ۳۵ میلیونه ډالره لګولي دي او هڅه کېږي، چې دغه پروګرام ټولو ولایتونو ته وغځول شي.

د کلیوالي صنایعو نندارتون د کابل ښار په بابر بڼ  کې جوړ شوی، چې د درېیو ورځو له پاره به پرانستل شوی وي.