د پاکستاني رسنيو د راپور له مخې د پېښور ښار د کارخانو مارکېټ ترڅنګ د پولیسو د تالاشۍ پر يوې پوستې د چاودنې له امله ۱۰ تنه وژل شوي او شاوخوا ۲۰ نور ټپيان دي.
تر اوسه لا معلومه نه ده، چې په وژل شويو او ټپيانو کې څومره پولیس شامل دي.
د پاکستان د ژغورنې چارواکي ویلي، چې دغه وژل شوي او ټپیان پولیس د خېبر ایجنسۍ په ملیشو پورې اړه لري.
د پاکستان ډان ورځپاڼه وايي، چې د خېبر پښتونخوا مرکز پېښور کارخانو مارکېټ ته نږدې د خېبرايجنسۍ د قبايلي سيمې او پېښور پر پوله د خاصه دار ځواکونو يوه چيک پوسټ ته نږدې د چاودنې پړه پاکستاني طالبانو (ټي، ټي، پي) پرغاړه اخیستې.
په دغه چاودنه کې د پاکستاني ملیشو موټر او چيک پوسټ په نښه شوى و، چې د دغو ځواکونو د يوه جګپوړي لاین افسر د نواب شاه افريدي په ګډون يو ماشوم او د خيبر ايجنسۍ يو ځايي خبريال محبوب شاه افريدي هم وژل شوي دي.
ځينې راپورونه وايي، چې دا یو بمي چاودنه وايي، خو د ځينو نورو راپورونو له مخې پر دغو خاصه دارو ځانمرګی برید شوی.
اوسمهال د پېښې ټپيان د پېښور حيات اباد "ميډيکل کمپليکس" ته لېږدول شوي، چې د ډېرو روغتيايي حالت د خرابيدو له امله ښايي د مړو شمېر له دې هم زیات شي.
راپورونه وايي، چې د پېښور امنيتي ځواکونو تر چاودنې وروسته سيمه محاصره کړې او همدا راز يې د پېښور_ تورخم لويه لار هم د موټرو د تګ را تګ پر مخ تړلې ده.
د خيبر پښتونخوا وزير اعلى او د پاکستان د کورنيو چارو د وزير په ګډون عمران خان او ګڼو نورو سياستوالو دغه برید په کلکو ټکو غندلی او په دې اړه د پوره تحقیقاتو غوښتونکي شوي.
یاده دې وي، چې د پېښورکارخانو مارکېټ په پېښور ښار کې تر ټولو ستر تجارتي مرکز ګڼل کېږي، چې د زیاتو مارکېيټونو له امله پکې د خلکو ګڼه ګوڼه هم زیاته وي.
