د طالب ډلې یوشمېر پخوانیو غړیو نن په کابل کې د یوې خبري غونډې پر مهال په پېژندپاڼه کې د مور نوم له لیکلو سره مخالفت وښود.
دوی وايي، د غربي هېوادونو د پلانونو پلي کول د افغانستان د خلکو لپاره د منلو نه دي.
د طالبانو د واکمنۍ پر مهال د امربالمعروف او نهی عنالمنکر ادارې مشر مولوي قلمالدین وویل، په افغانستان کې د اروپايي او غربي هېوادونو د پلانونو پلي کول ناشوني دي.
یو بل پخوانی طالب چارواکی سیداکبراغا هم په پېژندپاڼه کې د مور نوم لیکل د بهرنیانو پلان ګڼي او دا موضوع د منلو نه بولي.
د سولې دغې ولسي مجمع په خبرپاڼه کې لیکل شوي چې په پېژندپاڼه کې د مور نوم لیکل د مور نوم او د مور مقام ته سپکاوی دی.
خو یوشمېر مېرمنې وايي، په پېژندپاڼه کې د مور نوم لیکلو پر وړاندې هېڅ ډول دیني خنډ نشته.
سمیه او محبوبه وايي، اساسي قانون په پېژندپاڼه کې د مور نوم لیکلو ته اجازه ورکړې او پر وړاندې یې هېڅ ډول شرعي او قانوني خنډ نشته.
د ولسمشر د دویم مرستیال سرور دانش په مشري د کابینې د قوانینو کمېټې وړمه ورځ په پېژندپاڼه کې د مور نوم لیکلو موضوع تایید کړه.
تر دې وړاندې یوشمېر مېرمنو د (نوم مې چېرته دی؟) په نوم کمپاین کړی و او غوښتل یې چې په پېژندپاڼه کې باید د پلار ترڅنګ، د مور نوم هم ولیکل شي.
