په پروان کې ځېنې پولیس، د ولسي خلکو په وژنه کې لاس لري

په پروان ولایت کې له څه وخت راهیسې د وژنو او غچ اخیستلو پېښې زیاتې شوې دي، خو د دغه ولایت امنیې قوماندانۍ سلام وطندار سره په مرکې ویلي دي، چې د شبکه یې وژنو او غچ اخیستلو د پېښو تر شا ځېنې حکومتي وسله لرونکي کسان لاس لري.

د پروان امنیه قوماندان جنرال محمدزمان مموزي سلام وطندار ته وویل، هغه وسله لرونکي چې د ولسي خلکو په وژنو تورن دي؛ د امنیتي ځواکونو په لیکو کې دندې لري.

د مموزي پر خبره، دغه کسان د خپلو رخصتیو پر مهال جرمونه کوي او بېر ته خپلو دندو ته ورځي.

ویل کېږي، چې په پروان ولایت کې د پولیسو یو سرتېري او څو ولسي وګړو تر منځ له لفظي شخړې وروسته دغه سرتېري ۵ ولسي وګړي په وسله ووژل او وتښتېد.

په دوو بېلابېلو پېښو کې د ننګرهار یو سرتېری د چاریکارو بازار په یوې څنډه کې درې ولسي وګړي ووژل او همدا ډول له غزني ولایت نه پروان ته د پولیسو یو سرتېری راغلی و او په یوې پېښه کې یې ۵ تنه ولسي خلک ووژل.

د جنرال مموزي پر باور، د رخصتيو پر وخت باید له سرتېرو، وسلې او یا نور نظامي تجهیزات واخیستل شي او هغوی باید د وسلو د وړلو او له هغوی نه د ګتې اخیستلو اجازه ونه لري.

همدارنګه د پروان د ولایتي شورا د امنیتي کمېټې مسوول عبدالمتین قدوسي وايي، چې نامسووله وسله وال کسان د امنیتي ځواکونو په موجودیت کې په څرګند ډول پر خلکو ظلم او زیاتی کوي.

د قدوسي پر وینا، دغه نامسووله وسله وال کسان د پروان ولایت د مشهورو څېرو له موقفونو نه استفاده کوي او هیڅوک په دې اړه څه نه وايي، چې د دې تر شا د کوم کس لاس دی.

ویل کېږي، چې دغه نامسوله وسله وال د چاریکارو چوک، صیاد برګرام او سیدخېلو په سیمو کې مېشت دي او په ۱۰ نورو سیمو کې يې نظامي کمېټې جوړې کړې دي.

دوی د موټرسایکلونو په وسیله پنځه کسیزه ډله جوړوي او په ولسوالیو کې له خلکو په زوره پیسې اخلي.

که څه هم د پروان امنیه قوماندان وايي، چې د دغو ډلو د نیولو له پاره یې ځانګړې طرحه جوړه کړې، خو ښاریان بیا د قوماندان پر وعدو او ژمنو باور نه لري او وایي، چې دغو طرحو د امنیتي حالاتو په کابو کولو او ښه کولو کې هیڅ ډول بدلون نه دی راوستلی.

د پروان اوسېدونکي وايي، چې د دې ولایت نامسووله وسله والو کسان د طالب وسله والو څخه ډېر ظالمان دي.

د پروان اوسېدونکي وايي، چې د دې ولایت غیرمسوولو وسله والو په مراتبو سره په مرګ او ژوبله کې له طالبانو مخکې دي او د پروان د اوسېدونکي اصلي دښمنان هم همدغه وسله وال او د هغوی دولتي ملاتړي دي.