د وسله والو طالبانو یو قاضي تېره شپه په بغلان ولایت کې په یوې مېرمنې جنسي تېری کړی دی.
د بغلان د دوشي ولسوالۍ یوې امنیتي سرچینې د نوم نه خپرولو په شرط سلام وطندار ته وویل، پېښه هغه مهال رامنځته شوه کله چې په دوشي ولسوالۍ کې د طالبانو یو قاضي په یو کور کې میلمه وه او د شپې له خوا یې په ښځه جنسي تېری کړی دی.
د سرچینې په خبره، پېښه د دې ولسوالۍ په زورابی سیمه کې رامنځته شوې.
دی وايي، د کور خاوند هم له طالبانو سره اړیکه لري او کله، کله به طالبانو کورته ورتګ کولو.
سرچینه زیاتوي، د بغلان لهپاره د طالبانو له خوا نومول شوی والي هم په زورآبي سیمه کې دی او تورن قاضي یې د کور له خښتن سره ورغوښتلي دي او د پېښې څېړلو لهپاره یې یو کمېسیون ټاکلی دی.
د دوشي ولسوال شمس الدین سرحدي پېښه تاییدوي او وايي، د طالبانو قاضي لعل محمد نومېږي. د دوشي ولسوال وویل، د دوی د معلوماتو له مخې کوم کمېسیون چې د پېښې څېړلو لهپاره ټاکل شوی وو، لعل محمد په کې دغه تورونه رد کړي دي.
وسله والو طالبانو تراوسه پورې د دې پېښې په اړه رسنیو ته څه نه دي ویلي.
