ټاکل شوې وه، چې ولسي جرګه نن (شنبه جون ۱۱مه) له اجنډا سره سم په ټاکنیز نظام کې د سمون په پار د ولسمشر په تقنیني فرمان ته رایه ورکړي؛ خو د ټاکنیزو کمېسیونونو د دندو او واکونو پر سر لانجو له امله یو ځل بیا دغه قانون د ولسي جرګې له تصویبه پاتې شو.
وکیلانو په دې پرېکړه وکړه، چې د زیات بحث له پاره دغه فرمان ګډ کمېسیون ته راجع کړي.
د ولسي جرګې غړي په دې ماده په یوې خوله نه وو، چې ولسمشر له اجرایوي ریاست سره په سلا مشوره د ټاکنیزو کمېسیونونو کمېشنران وټاکي.
په ورته وخت کې ځېنې وکیلانو یو پر بل د ټاکنو د ځنډولو تور پورې کړ او زیاته یې کړه، ځېنې وکیلان نه غواړي، چې د لسمشر تقنیني فرمان تصویب شي او په ټاکنو کې سمون را منځته شي.
په دې اړه د ولسي جرګې غړې فوزیه کوفیې وویل، چې یو شمېر وکیلان د شخصي ګټو پر بنسټ نه غواړي، چې دغه فرمان تایید شي.
کوفیې وویل، چې ځېنې وکیلان په دې پوهېږي، که دغه فرمان د تایید رایه واخلي او د ولسي جرګې ټاکنې وشي دوی نه شي کولی، چې د خلکو د باور رایه واخلي او دغه وکیلان د ټاکنو خنډ ګرځي.
له بل لوري د ولسي جرګې غړی عبدالستار خواصي وايي، چې د جرګې غړي د ټاکنو ترسره کول غواړي، خو حکومت د ټاکنو د تر سره کولو له پاره اراده نه لري.
دی وايي، که حکومت د ټاکنو اراده لرلی، نو په پخواني جوړښت به یې ټاکنې کړې وې.
د ولسي جرګې رییس عبدالروف ابراهیمي د غونډې په پای کې وویل، چې په ټاکنیزو کمېسیونونو کې د سمون راوستلو په برخه کې د ولسمشر تقنیني فرمان په اړه پرېکړه لا ډېر فکر ته اړتیا لري او ولسي جرګې په ګډ کېسیون کې به پرېکړه پرې کېږي.
