کبیراحمد د هغه ځوان مستعار نوم دی چې غوښتل یې په هېواد کې د ناامنۍ، اقتصادي او ځینو نورو ستونزو له کبله اروپا ته لاړ شي.
نوموړي د کابل په حبیبیې لېسه کې د ښوونځي دوره پای ته ورسوله او څو کاله وړاندې د کانکور ازموینې له لارې د کابل پوهنتون د فارمسي پوهنځي ته بریالی شو. له څلور کلنو زدهکړو وروسته یې په یاده څانګه کې لیسانس ترلاسه کړ، خو د ناامنیو، اقتصادي ستونزو او په اروپا کې د یوه ښه ژوند لپاره یې اروپا ته د تګ خیال په سر کې و.
کبیراحمد وايي، اروپا ته د تګ پرېکړه یې وروستۍ او ان له قاچاقي سره یې اړیکه ونیوله چې اروپا ته د قاچاقي تګ د جزیاتو په اړه ورسره خبرې وکړي.
د نوموړي په وینا، قاچاقیانو اروپا ته تګ ورته د یو ګیلاس اوبو څښلو په څېر وښود او ژمنه یې ورسره وکړه چې د لس زرو ډالرو په بدل کې به یې د ایران او ترکیې له لارې المان ته رسوي.
که څه هم د کبیراحمد کورنۍ نوموړي ته د تګ اجازه نه ورکوله، خو ده ټینګار کاوه چې باید د یوه ښه ژوند لرلو په موخه اروپا ته لاړ شي.
هغه چې اروپا ته د تلو په خیال کې و، په ناڅاپي توګه یې یو ماښام له سلاموطندار راډیو نه اروپا ته د صدیقالله په نوم د یوه ځوان د قاچاقي تګ کیسه واورېده.
د کبیراحمد په وینا، د صدیقالله کیسه لامل کېږي چې دی اروپا ته له قاچاقي تګ نه راوګرځي.
کبیراحمد د صدیقالله د ژوند کیسې په اورېدو سره، اروپا ته د قاچاقي تګ پر مهال له سختو لارو خبرېږي او اروپا ته د ناقانونه تګ فکر له ذهن نه وباسي.
کبیراحمد اوس د کابل ښار په یوه درملتون کې کار کوي او هغو ځوانانو ته چې اروپا ته د تګ فکر لري، لارښوونه کوي چې انساني قاچاقیان یې و نه غولوي او له ناقانونه لارو بهرنیو هېوادونو ته له تګ نه تېر شي.
