د هرات ولایت امنيې قومندانۍ د جنايي څېړنو رییس سېدګل اغا هاشمي سلام وطندار ته وویل، چې د " اریا ترکمن نبي زاده" په نوم د ګازو په يوه زېرمه کې د اور لګېدنې له امله ۱۱ تنه وژل شوي او ۱۲ نور ټپيان دي.
دغه سيمه د کمرکلاغ په نامه یاديږي، چې د هاشمي په وينا د ياد شرکت د ګازو یو ټانکر له سوځېدو وروسته چاوديدلی او د شاوخوا سيمو اوسېدونکو ته يې تاوانونه اړولي دي.
د اورلګېدنې په وخت کې د دغه شرکت مشر، چې زوی يې هم ورسره وو هم سوځېدلی او د درملنې له پاره له هېواده بهر استول شوی دی.
د ګازو په دغه اورلګېدنه کې د اریا ترکمن نبي زاده شرکت دوه انجینیران هم سوځېدلي دي.
د راپورونو پر بنسټ، د اورلګېدنې سره سم د اطفايې کارکوونکي او ځينې امنيتي ځواکونه سيمې ته رسېدلي او د اور له پراخېدو مخينوی يې کړی.
له بل لوري هرات والي ویاند احسان الله حیات وايي، چې په دې اورلګېدنه کې د شرکت رییس ته ۴۲ میلیونه افغاني مالي زیان رسېدلی دی. نوموړی یې لامل د شرکت د ساتونکو بې غوري ګڼي.
په ورته وخت کې د هرات حوزوي روغتون رییس ډاکټر محمد رفیق شیرزی وايي، د وژل شویو او ټپیانو په ډله کې ماشوما او مېرمنې هم شاملې دي.
د پېښې په سیمه کې د عینې شاهدانو وویل، د نبي زاده شرکت په تاسیساتو کې د دریېو پرلپسې چاودونو غږونه یې واورېدل او له پېښې سره سم یې ځانونه خوندي سیمو ته ورسول.
دا په داسې حال کې ده، چې د هرات ښار اوسېدونکو په وار ـ وار سره له حکومت غوښتي دي، چې د هرات ښار له شمال برخې نه د استوګنې سیمې ته نږدې د ګازو شرکتونو له سیمې وباسي، خو دولت تر اوسه پورې په دې برخ کې عملي پلان لري.
