د هندوستان مخکښه ورزشي ټلویزیوني شبکې (سټارسپورټس) اخر هم کنګوسو ته د پای ټکی کیښود او د افغانستان د راتلونکو ژوندیو لوبو نوملړ یې خپورکړ.
د یاد ټلویزیون له خوا د ورکړل شویو معلوماتو له مخې، چې د ایرلینډ او سکاتلینډ په کوربتوب کرکټ نړېوال جام ټاکنیز پړاو لوبو کې به (ریکارډ) زیات شمیر۲۰ لوبې په ژوندۍ بڼه خپرې شي.
د سټارسپورټس شبکې د خپرو شویو معلوماتو له مخې، چې د سیالیو لومړي (لیګ پړاو) لوبو څخه به د هرې ګډون کوونکې لوبډلې ۳ لوبې په ژوندۍ بڼه مینه والو ته وښودل شي.
د یاد ټلویزیون د معلوماتو له مخې،د دویم پړاو لوبو وړاندې به د سیالیو د رسمي لوبو د پیل په لومړۍ ورځ د جولای په ۹ مه نیټه به د افغانستان او هالینډ لوبه، دویمه لوبه د جولای په ۱۰ نیټه د افغانستان او عربي اماراتو ترمنځ او درېیمه لوبه به د جولای په ۱۲مه نیټه د افغانستان او سکاټلینډ ترمنځ په ژوندۍ بڼه کرکټ مینه والو ته وړاندې کړي.
ویل کیږي، چې د هېواد درې واړه سیالۍ به د افغانستان په وخت ماښام ۶ بجې او ۴۵ دقیقې پیل شي.
د یادې ټلویزیوني شبکې د معلوماتو له مخې،د ۲۰اوریزه کرکټ نړیوال جام ټاکنیزپړاو لوبې به د
(سټارسپورټس ۴ او ایچ ډي ۴) ټلویزیونونو له خوا په ژوندۍ بڼه خپرې شي.
دغه راز که افغانستان د سیالیو دویم پړاو ته لاره پیدا کړي، نو یاد ټلویزیون د ژمنې له مخې به د جولای په ۲۱ مه او ۲۳ مه نیټه ددې سیالیو کوارټرفاینل لوبې، د جولای په ۲۵ مه نیټه به فاینل لوبې، د جولای په ۲۶ مه نیټه به د سیالیو د اتلولۍ له پاره فاینل او دغه راز د درېیم مقام لوبه په ژوندۍ بڼه په یاد ټلویزیون وښودل شي.
ټاکل شوې ده، چې افغانستان به د سر په سرڅلورم ځل له پاره راتلونکې ۲۰۱۶ م زېږدیز کال دهندوستان په کوربتوب شپږم پړاو ۲۰ اوریزه کرکټ نړېوال جام سیالیو ته د رسېدو هڅه وکړي.
افغانستان په ټاکنیز پړاو کې د ګډون کوونکو ۱۴ لوبډلو په ویش کې دویم مقام کې له هالینډ، سکاټلینډ ، عربي امارات، کینیا، کاناډا او عمان لوبډلو سره لوبېږي.
د کرکټ نړېوالې شورا د پلان له مخې به دا ځل هم ۲۰ اوریزه کرکټ نړېوال جام سیالیو ته ۶ لوبډلې لاره پېدا کړي.
د یادونې وړ ده، چې افغانستان په ۲۰۱۰ م زېږدیز کال ټاکنیز پړاو کې د اتلې لوبډلې په توګه ۲۰ اوریزه کرکټ نړېوال جام ته، خو په ۲۰۱۲ او ۲۰۱۴ م زيږدیز کلونو نړېوال ټاکنیزپړاو لوبو څخه د دویم مقام لرونکې لوبډلې په توګه لاره پېدا کړې وه.
