په غور کې د طالبانو نظامي مانور

د غور ولایتي شورا ځېنې غړي او مدني فعالان وايي، له څوو ورځو راهیسې وسله‌والو طالبانو د ملا احمدشاه چې په دې ولایت د طالبانو مرستیال دی او دغه‌راز د دې ډلې د یو بل قوماندان ملاهجرت په مشرۍ یې په درېیو لوېدیځو ولسوالیو کې نظامي مانورونه پیل کړي دي.

د غور ولایتي شورا مرستیال عبدالرحمان عطشان سلام‌وطندار ته وویل، طالب وسله‌وال په شهرک، تولک او ساغر ولسوالیو کې فعال حضور لري او د بریدونو پلانولو په حال کې دي.

د ولایتي شورا دغه غړي په خبره، طالبان په دې ولسوالیو کې د نظامي ښوونې روزنې سربېره د حکومت خلاف د خلکو راټول او تبلیغ پيل کړی دی. عطشان وايي، که حکومت د دغو ولسوالیو امنیت ته پام ونه کړي امنیتي حالت به له دې هم خراب شي.

د غور مدني ټولنې مسوول خدایار واقف د دې ولایت په لوېدیځو ولسوالیو کې د امنیتي حالت په اړه اندېښنه ښيي او وايي، له دغو ولسوالیو سربېره طالبان د غور ـ هرات پر لویه لاره هم واک لري، خو حکومت په دې اړه تراوسه چپ پاتې شوی دی.

ورته وخت کې د والي ویاند عبدالحی خطیبي د طالبانو د نظامي مانور ترسره کولو موضوع ردوي او وايي، طالبان یوازې د غور ـ هرات لویې لارې په اوږدو کې ډېر کم حضور لري.

دا څرګندونې داسې مهال مطرح کېږي چې د غور ولایتي شورا غړي او مدني فعالان وايي، دمګرۍ د غور ۶ لوېدیځې ولسوالۍ د ترهګرو له‌خوا لوړ ګواښ سره مخ دي. په خبره یې، د شهرک ولسوالۍ په تازه نښته کې یو پولیس سرتېری وژل شوی او ځېنې یې ټپیان شوي دي.