غزني کې د ښوونکیو ښارګوټي رامنځته کول او وېشل د پوهنې وزارت له پراختیايي پروګرامونو شمېرل کېږي؛ خو ښوونکي وايي، د دې ښارګوټي عملي چارې دې ژر تر ژره پیل شي.
غزني کې ځېنې ښوونکي وايي، د پوهنې ریاست چارواکي هرکال له دوی سره د ښارګوټي د وېشلو لړۍ د ژر پیلېدلو ژمنه کوي؛ خو د نږدې لسو کلونو په تېرېدو سره د غزني ښوونکیو د استوګنیځ ښارګوټي په اړه معلومات نهشته.
غزني کې د ښوونکیو ټولنې مرستیال قاسمعلي احمدي هم وايي، دغې اتحادیې د ښوونکیو استوګنیځ ښارګوټي ټول حقوقي او تخنیکي کارونه خلاص کړي؛ خو د پوهنې ریاست او اړوندو ادارو چارواکي یې د وېشلو په برخه کې بېغوري کوي.
هاخوا د غزني پوهنې رییس محبالرحمان انصار مني چې تېرو ۷ کلونو کې د پوهنې ریاست له لوري د ښوونکیو استوګنیځ ښارګوټي د نقشې تطبیق او وېشلو په برخه کې هېڅ کار نهدی شوی؛ خو وروستیو څلورو میاشتو کې یې د دې پروژې د اجرا کېدو دوسیې ته جدي پام کړی او روان کال به ۲۵۰ ښوونکیو ته ځمکې ووېشل شي.
د ده په خبره، په ټوله کې د نږدې ۵۰۰ تنو ښوونکیو د ځمکو د وېش کار پیل شوی او د ۱۶۰۰ تنو هغو کارونه ۸۰ سلنه خلاص دي او که کومه جدي ستونزه پېښه نهشي؛ په ۱۳۹۷ کال کې یې د وېش رسمي لړۍ پيلوي.
هغه د دې استوګنیځ ښارګوټي عملي کولو کې د زورواکیو د پراخې لاسوهنې ادعا کوي او وايي، د امنیت تامینولو لهپاره یې امنیتي بنسټونو سره خبرې پیل کړېدي.
د غزني د پوهنې رییس وايي، هغه ځمکه چې ۱۰۰۰ ښوونکیو ته ترې د ځمکو د وېش لړۍ پیلېدله؛ د زورواکیو له لوري غصب شوې او اوس د پوهنې ریاست د دې پروژې د پلي کولو لهپاره نور ځایونه په پام کې نیولي دي.
خو د ولایتي شورا د پوهنې کمېټې مسوول حسنرضا یوسفي د ښوونکیو استوګنیځ ښارګوټي د نه وېشل کېدو لامل د پوهنې اړوندو چارواکیو د ارادې نهشتوالی بولي.
ښاغلی یوسفي د ښوونکیو د اوسني استوګنیځ ښارګوټي وېشلو او د پخوانۍ ښارګوټي غصب کې د پوهنې اداره او د ځمکې غاصبین د خنډ لامل ګڼي.
په تېرو څوو کلونو کې د غزني زرګونه جریبه ځمکه غصب شوې؛ خو دولت هر وخت له غاصبانو نه د غصب شویو ځمکو د راګرځولو ژمنې کوي چې تر ډېره د ژمنو تر حدودو پاتې دي.
