د زابل ولایت امنیتي چارواکي وايي، چې له ۳ ورځو راهیسې په ارغنداب، خاک افغان او دایچوپان ولسوالیو کې د وسله والو طالبانو او داعش اورپکو ترمنځ په روانو سختو نښتو کې د دواړو خواو نه ټولټال ۹۴ تنه وژل شوي دي.
د دغه ولایت د امنیت امر سمونوال غلام جیلاني فراهي وايي، د دوي د کره استخباراتي معلوماتو پر بنسټ تېره ورځ د طالبانو او داعش تر منځ په نښته کې د دواړو خواو ترمنځ ۳۰ تنه وژل شوي او نن ورځ (یک شنبه) د دواړو وسله والو ډلو ترمنځ په روانه نښته کې ۵۰ تنه داعشیان او ۱۴ طالبان وژل شوي دي.
فراهي د یادې نښتې د ټپیانو په اړه معلومات ور نه کړل.
تر اوسه پورې طالبانو او داعش ډلې په خپلو کې د نښتې په اړه څه نه دي ویلي.
له بل لورې د زابل ولایتي شورا د طالب او داعش ډلو تر منځ روانې نښتې مني او دې جګړو اندېښمن کړي دي.
د شورا غړې فوزیه کاکړه، د ولسي خلکو د ژوند خوندیتوب په اړه اندېښنه څرګندوي او وايي، چې د زابل ولایتي شورا له سیمه ییزو چارواکو سره په اړیکه کې ده، چې د ولسي خلکو ساتنه وکړي.
نوموړې په دې اړه سلام وطندار ته وویل، چې تر اوسه پورې د ولسي خلکو د مرګ ژوبلې په اړه دوی ته کوم راپور نه دی ور رسېدلی.
په ورته وخت کې د سوېلي حوزې د بشري حقونو خپلواک کمېسیون د رسنیو مسول عبدالعزیز اکرمي وايي، چې د وسله والو ډلو خپلمنځیو نښتو کې ډېر وخت ولسي وګړو ته زیان رسیږي.
نوموړی له دواړو وسله والو ډلو غواړي، چې د ولسي خلکو ژوند او شتمنیو ته پام وکړي.
د زابل خاک افغان ولسوالي له تېرو ۸ کالونو راهېسي د وسله والو طالبانو ترواک لاندې ده او د دې ترڅنګ دایچوپان او ارغنداب ولسوالیو اکثره سیمي هم د وسله والو طالبانو په لاس کي دي؛ دا لومړی ځل دی، چې په دغو سیمو کې د وسله والو طالبانو او داعش ډلو ترمنځ زوره ورره نښته کیږي.
تېره ورځ د زابل د والي ویاند ويلي و، چې دغه جګړې په حقیقت کې د طالبانو د دوه ډلو ترمنځ رامنځته شوي، چې د یوې مشري ملا دادالله منصور او د بلې مشري ملا اختر محمد منصور کوي.
داعش له ۷ مسافرونو سرونه غوڅ کړي
د زابل ولایت امنیت امر سمونوال غلام جیلاني فراهي وايي، چې په دغه ولایت کې داعش وسله والې ډلې ۳ تنه نارینه هزاره ګان او ۴ تنه مېرمنې چې په دې وروستیو کې یې د غزني ولایت له ګیلان ولسوالۍ څخه د زابل ولایت ارغنداب ولسوالۍ ته تښتولې وې وژلي دي.
نوموړي سلام وطندار ته وویل، چې د ۷ تنو جسدونه د کلي سپين ږیرو له خوا زابل ولایت شاه جوی سیمه ییز روغتون ته ور وړي دي.
د غزني ولایتي شورا رییس خالق داد اکبري او د جاغوري ولسوال ظفر شریف سلام وطندار سره په مرکه کې د داعش ډلې له لوري د دغو کسانو وژل کېدل ومنل.
اکبري وایي، چې د تېر کال راهیسې د جاغوري ولسوالۍ ۱۷ تنه اوسېدونکي د غزني ولایت د ولسوالیو په لاره کې د داعش ډلې له خوا تښتول شوي دي.
نوموړی وايي، چې په زابل ولایت کې د وسله والو طالبانو او داعش ډلې تر منځ په نښته کې ۳ تنه مېرمنې او ۴ نارینه وو څخه سرونه غوڅ کړي دي او د پاتې ۱۰ تنو برخلیک معلوم نه دی.
اکبري زیاته کړه، چې د دوی ته د ور رسېدلي معلوماتو پربنسټ داعش ډلې سره د نیول شویو کسانو له ډلې یوه مېرمنه تښتېدلې ده او اوس مهال د طالبانو سره ده او دغه ښځه ځان د ننګرهار معرفي کوي.
ظفر شریف وايي، چې د جاغوري ولسوالۍ قومي مشران د وژل شویو قربانیانو په جسدونو پسې تلل، خو د نښتو له امله و نه توانېدل.
