د یو شمېر ولایتونو اوسېدونکي وايي چې د نورو ورځو په پرتله په روژې میاشت کې د خوراکي توکیو بیې له ۱۰ تر ۳۰ سلنه لوړې شوې دي.
د هرات، تخار او بدخشان ولایتونو د اوسېدونکیو په وینا، د خوراکي توکیو په بیو کې له ۱۰۰ تر ۵۰۰ افغانیو ډېروالی راغلی دی.
د بدخشان اوسېدونکی زمانالدین او د هرات اوسېدونکی غلام رسول وايي، په بازارونو کې د خوراکي توکیو بیې لوړې شوي او مسوولو ادارو یې هم تر اوسه د کنټرول لپاره هېڅ اقدام نهدی کړی.
دوی وايي، په روژې میاشت کې د یوې بوجې اوړو بیه له ۱۲۰۰ افغانیو نه ۱۵۰۰ ته لوړه شوې او همداسې د نورو توکیو بیو هم لوړې شوي او پهکار ده چې هټۍوال او د خوراکي توکیو پلورونکي پهدې میاشت کې له خپلو هېوادوالو سره د ظلم پر ځای انصاف وکړي.
که څه هم په بازارونو کې د بیو لوړوالي لامل سوداګر بلل کېږي، خو د سوداګرۍ او صنایعو خونې مرستیال خان جان الکوزی د افغانیو په وړاندې د ډالرو ارزښت لوړوالی او په روژه کې بازار ته د خلکو ډېره مراجعه لام شوې چې د توکیو بیې لوړې شي.
اړوند مطالب:
ننګرهار او کونړ کې د خوراکي توکیو بیې لوړې شوي
د نوموړي په وینا، د خوراکي توکیو بیې د نړۍ په بازارونو کې ثابتې دي او یوازې په افغانستان کې لوړې شوې دي. الکوزی زیاتوي، سوداګرو د توکیو بیې نهدي لوړې کړي، هټۍوال او د سړکغاړې پلورونکي پر خپل سر د توکیو بیې لوړوي چې حکومت یې باید د کنټرول په برخه کې مداخله وکړي.
په همدې حال کې د یو شمېر ولایتونو سیمهييز مسوولان په بازار کې د نرخ د کنټرول لپاره د ځانګړیو کمېسیونونو د جوړولو خبر ورکوي.
د هرات د والي ویاند غلام جیلاني فرهاد وايي، پهدې برخه کې یې کمېسیون جوړ کړی چې هغوی به په بازار کې څارنه وکړي او د توکیو بیې به کنټرول کړي.
که څه هم مسوولان د توکیو د بیو کنټرول لپاره د ځانګړیو کمېسیونونو د جوړېدو خبر ورکوي، عام خلک وايي چې په بازار کې د خوراکي توکیو بیې ورځ تر بلې لوړېږي.
اوس په بازار کې د یوې ۲۵ کیلويي ښو هندي وریجو بیه له ۲ زره افغانیو ۲۵۰۰ او ۳ زرو ته لوړه شوې او یوه بورۍ اوړه هم له زر افغانیو نه ۱۳۰۰ او ۱۵۰۰ افغانیو ته لوړ شوي دي. د نورو خوراکي توکیو بیې هم د پام وړ لوړې شوې دي.
