په هرات کې د کډوالو او راستنېدونکو چارو ریاست چارواکي وايي، هره ورځ له ۵۰۰ ډېر افغان کډوال له ایرانه د هرات اسلامکلا له لارې افغانستان ته را اړول کېږي.
د هرات د کډوالو او راستنېدونکو چارو رییس جاوېد نادم سلاموطندارته ویلي چې په تېرو درېوو میاشتو کې له ۲۲ زرو نه ډېر افغان کډوال چې ماشومان، ښځې، د لوړ عمرلرونکي کسان او بېسرپرسته مېرمنې پهکې شاملې دي، د هرات اسلامکلا له لارې په زوره افغانستان ته را اړول شوي دي.
هغه هېوادوال چې تازه د ایران له لوري د هرات اسلامکلا له لارې را اړول شوي، د ایراني ځواکونو او د کار مالکانو له ناسم چلنده شکایت کوي.
غلامصدیق چې ۵۵ کلن دی، په ایران کې له ۷ میاشتنۍ کارګرۍ وروسته اوس هرات ته را اړول شوی دی.
دغه سپینږیری د ایراني ځواکونو او د کار مالکانو پر ناسم چلن د نیوکې ترڅنګ وايي، له مجبورۍ نه ایران ته د کار لپاره تللی و، خو هلته له پنځو تر شپږو میاشتو کار وروسته یې نه یوازې د کار پیسې ورکړې، بلکې بېرته خپل هېواد ته هم راواړوه.
د هرات یو مدني فعال جاوېد حمید باور لري، د ایران حکومت چې هر وخت وغواړي د افغانستان پر حکومت فشار راوړي او هلته له افغان کډوالو د سیاسي وسیلې په توګه ګټه اخلي.
د ایران له لوري د افغان کډوالو په زوره را ایستلو په اړه اندېښنې په داسې حال کې دي چې تېره ورځ د کډوالو په چارو کې د ملګرو ملتونو سازمان اعلان وکړ چې د ۲۰۲۰ کال په تېرو ۸ میاشتو کې له ۴۴۷ زرو نه ډېر افغان پناهغوښتونکي د ایران له لوري خپل هېواد ته را اړول شوي دي.
یاد سازمان په یوه خبرپاڼه کې ویلي، را ګرځول شوي پناهغوښتونکي د سږ کال جنوري میاشتې له لومړۍ نېټې نه د اګېسټ تر پنځلسمې پورې خپل هېواد ته را اړول شوي او له ایرانه د افغان کډوالو د را اړولو کچې د تېر کال په پرتله ۷۱ سلنه زیاتوالی موندلی دی.
د خبرپاڼې له مخې، دغه کډوال د نیمروز او اسلامکلا له لارې افغانستان ته را اړول شوي او د کډوالۍ نړیوال سازمان د تېرې اوونۍ پر مهال له هغو سلګونو کډوالو سره بشرپاله مرستې کړي چې سندونه یې نه لرل.
په هرات کې د ایران کونسلګرۍ بیا تل دا ټینګار کړی چې د افغانستان هر وګړی چې له پاسپورټ پرته د ایران خاورې ته دننه شي، را وبه یې باسي.
