د سولې د عالي شورا د نړیوالو اړیکو کمېټې مشر حبیب الله پوځي سلام وطندار ته وویل، داسې معلومېږي، چې له طالبانو سره به د سولې د خبرو درېیمه څلور اړخیزه ناسته د فبرورۍ په میاشت کې وشي.
پوځي د غونډې د جوړېدا د ځای په اړه څه ونه ویل.
ده زیاته کړه، تر کومه چې د دوی هلو ځلو دوی ته تمه ورکړې، معلومېږي، چې د دولت مخالفې وسله والې ډلې، لکه طالبان او حزب اسلامي به خبرو ته حاضر شي.
د پوځي پر وینا، که چېرې د ملامنصور ډله د سولې خبرو اترو ته حاضره شي؛ د دې امکان شته، چې طالبان او حزب اسلامي هم خبرو ته زړه ښه کړي.
پوځي وايي، که چېرې د سولې خبرو اترو په اړه یو منظم او سم مېکانیزم جوړ شي؛ په یقین سره دا خبرې یوې مثبتې پایلې ته رسېدلی شي.
د سولې د عالي شورا د دې چارواکي په بارو، په دغو ناستو کې د چين او امریکا ګډون، دې خبرو ته موثریت ورکوي. ده پر وینا، که چېرې دا خبرې پیلېږي؛ د دې دواړو هېوادونو د استازیو اشتراک دې خبرو ته مثبته پایله ورکوي.
په ورته وخت کې، په قطر کې د پګواش له خوا د جوړه شوې غونډې ګډونوال او د چارو شنونکی محمد حسن حقیار وايي، چې د قطر په غونډه کې د طالبانو له استازیو سره له لیدنو کتنو نه داسې برېښي، چې په راتلونکیو خبرو اترو کې به د طالبانو استازي ګډون وکړي.
د ده پر وینا، د طالبانو له خبرو معلومېدله، چې جګړه د حل لاره نه ده. د ده پر باور اساسي خبره دا ده، چې په دې څلور اړخیزو ناستو کې چین او امریکا ښکېل دي؛ نو طالبان هم د یو تضمین په توګه دې موضوع ته ارزښت ورکوي، ځکه یې زړه ښه کړی دی، چې په دې خبرو اترو کې ګډون وکړي او ښې پایلې ولري.
د افغانستان، امریکا، چین او پاکستان تر منځ د څلور اړخیزو خبرو لومړنۍ غونډه په اسلام اباد او دویمه په کابل کې شوې دي، خو د درېیمې له پاره له وړاندې پاکستان غوره شوی و، خو تر اوسه په دې اړه کره معلومات نه دي رسنیز شوي.
