د بلخ ولایت د پولیسو ویاند شېرجان دراني سلام وطندار ته وویل چې د ( پي، ای، ان) ۸ تنه کارکونکي چې د بلخ ولایت په زراع ولسوالۍ کې د کرنیزو تخمونو تولید په چارو بوخت وو؛ تېره شپه د وسله والو له خوا د یوه برید په پایله کې وژل شوي دي.
د دراني په وینا، د وژل شویو په ډله کې یوه مېرمن هم شامله ده.
په ورته وخت کې د بلخ یوې امنیتي سرچینې چې نه یې غوښتل نوم یې واخیستل شي؛ سلام وطندار ته وویل، چې په دغه برید کې وسله والو د PIN له ۹ تنو کارکوونکو نه سرونه غوڅ کړي دي.
د بلخ ولایت د پولیسو ویاند وايي، چې تر دې مهال په دې اړه څوک نه دي نیول شوي او د پولیسو څېړنې دوام لري.
د بلخ سرپرست والي ویاند منیر احمد فرهاد سلام وطندار ته د پېښې په پخلي سره وویل، چې وژل شوي کارکوونکي ټول افغانان دي.
فرهاد زیاته کړه، چې People in need) PIN) د بلخ په کلیو او بانډو کې د کرنې، روغتیا او پرمختیايي پروګرامو د پلي کولو په برخه کې کارونه کوي.
د بلخ ولایت د ویاند په خبره د دغه بنسټ مرکز په قزاقستان کې دی او دغه هېواد د دغه بنسټ مالي ملاتړی دی.
تر دې مهاله د دې برید مسولیت چا په غاړه نه دی اخیستی.
