د افغانستان فوټبال ملي لوبډلې لخوا د لاووس او بنګله دیش فوټبال ملي لوبډلو خلاف کیدونکو دوستانه فوټبال سیالیو ته تمرینات پیل شوي.
د افغانستان فوټبال فدراسیون دیوې خبرپاڼې په خپرولو سره وایي چې د افغانستان فوټبال ملي لوبډلې ۲۳ کسیزه ملي لوبډله د بحرین هیواد تمریني کمپ ته رسیدلې ده.
ویل کیږي چې له ملي لوبډلې سره په دې روزنیز کمپ کې نن نورالله امیري او مدثرذکریا هم یوځای شي.
د افغانستان فوټبال فدراسیون وایي چې اوسمهال د بحرین په کوربتوب د ملي لوبډلې تمرینات په بریالیتوب روان دي او د ملي لوبډلې مورال هم ډیر لوړ دې.
ټاکل شوې ده افغان فوټبال ملي لوبډله د روان کال مهمو نړیوالو فوټبال سیالیو ته د ښه چمتووالي په موخه د روانې (مۍ) میاشتې په ۲۹ مه نیټه له لاووس فوټبال ملي لوبډلې سره ددوی په کوربتوب لوبه ترسره کړي.
د فوټبال فدراسیون د معلوماتو له مخې چې افغان فوټبال ملي لوبډله به دراتلونکې (جون) میاشتې په ۲ مه نیټه په ډهاکه کې له بنګله دیشۍ فوټبال ملي لوبډلې سره هم دوستانه نړیواله لوبه ترسره کړي.
ددې تمریناتو او له لاووس او بنګله دیش فوټبال ملي لوبډلو سره د سیالیو موخه د راتلونکې (جون) میاشتې په ۱۱ مه نیټه فوټبال اسیایي ټاکنیزپړاو سیالیو ته ښه چمتووالی ښودل شوی دې.
ټاکل شوې ده افغانستان د روسیي په کوربتوب ۲۰۱۸ کال فوټبال نړیوال جام سیالیو ته د اسیا په ټاکنیزپړاو سیالیو کې له سوریه، کمبودیا، جاپان او سنګاپور فوټبال ملي لوبډلو سره په تګ او راتګ پړاونو کی لوبې ترسره کړي.
د افغانستان فوټبال فدراسیون وایي چې له سوریه فوټبال ملي لوبډلې سره به د جون په ۱۱ مه نیټه کیدونکې سیالۍ په افغانستان کې دامنیتي ستونزو له کبله د ایران په کوربتوب ترسره شي.
