د عامې روغتیا وزارت وايي، په تېرو څلېرویشت ساعتونو کې یې د کورونا ویروس ۱۶۴ مثبتې پېښې ثبت کړي چې په دې سره په هېواد کې پر کورونا د اخته کسانو شمېر ۲۳۳۵ ته رسېږي.
د عامې روغتیا وزارت ویاند وحیدالله مایار په یوه خبري غونډه کې وویل چې د کورونا ویروس تازه مثبتې پېښې په کندهار، کابل، بغلان، هرات، بلخ، ننګرهار، بادغیس، لغمان، بامیان، سمنګان، کاپیسا، جوزجان، میدانوردګ، پروان او نورستان ولایتونو کې ثبت شوې دي.
د روغتیا وزارت د راپور له مخې، د یادو کسانو له ډلې ۴۵ کسان په کندهار، ۴۴ په کابل، ۲۴ په هرات، ۱۳ په بغلان، ۶ په ننګرهار، ۶ په جوزجان، ۵ په کاپیسا، ۴ په بلخ، ۴ په بادغیس، ۴ په بامیان، درې درې په لغمان او سمنګان، دوه په میدانوردګ او یو یو کس هم په پروان او نورستان ولایتونو کې پر کورونا اخته شوي دي.
د عامې روغتیا وزارت زیاتوي، تر اوسه پر کورونا د اخته کسانو له ډلې ۳۱۰ هغه یې بېرته رغېدلي دي.
وحیدالله مایار وايي، په تېرو ۲۴ ساعتونو کې دوه کسان په ننګرهار او دوه هم په بلخ کې د کورونا له کبله مړه شوي چې په دې سره د دغه ویروس له امله د مړو شمېر هم ۶۸ کسانو ته رسېږي.
د عامې روغتیا وزارت د مسوولانو په وینا، ۲۲۸ روغتیايي کارکوونکي هم پر کورونا ویروس اخته شوي وو چې اوس یې یوشمېر هغه بېرته رغېدلي دي.
