پاکستاني رسنیو څو شېبې مخکې راپور ورکړ چې هندي او پاکستاني پولهساتو ځواکونو د کشمیر په پوله په تازه پېښه کې پر یو بل ډزې کړېدي.
العربیه وېبپاڼې د پاکستان «ډان نیوز» وېبپاڼې د کشمیر د یو چارواکي له خولې لیکلي چې هندي پولهساتو ځواکونو د هوان مرمیو په وارولو سره پر پاکستان برید کړی چې د استوګنیزو ځایونو په لګېدلو سره ۴ تنه ملکیان وژل شويدي.
پاکستاني رسنیو خبر ورکړی چې لهدې سره هممهاله د پاکستان د کشمیر هوایيډګر تړل شویدی.
د پاکستان د ملي پوځ ویاند جنرال اصف غفور په خپل ټویټر لیکلي چې پاکستاني ځواکونو د هند دوې الوتکې ویشتي دي.
د اصف غفور په خبره، د ویشتل شویو الوتکو یو هندي پیلوټ ژوندي نیول شوی او د دوو نورو د پيدا کولو لهپاره پلټنې پيل شوېدي.
ده ادعا کړې چې دواړه جنګي الوتکې یې د پاکستان په فضا کې ویشتې دي.
په ورته وخت کې «انډیا ټوډی» هندي ټلوېزیون د دې هېواد د پوځي چارواکیو له خولې لیکلي چې د هند د کشمیر او جامو په خاوره کې یې د پا کستان F-16 الوتکه ویشتې ده.
پرون هندي هوايي ځواکونو د پاکستان په سرحدي سیمه کې د جیش محمد د وسلهوالې ډلې پر مرکزونو بریدونه کړي وو او د ۳۰۰ «ترهګرو» د وژلو ادعا یې کړېوه.
دا پهداسې حال کې ده چې پاکستاني چارواکیو بیا دا ادعا رد کړې وه او ویلي وو چې پېښې هېڅ مالي او ځاني زیان نهلرلو.
د هند او پاکستان ترمنځ حالات هغه وخت ترینګلي شول چې د هند په کشمیر کې جیش محمد وسلهوالې ډلې پر هندي پوځیانو موټربم برید کې شاوخوا ۴۰ تنه پوځیان ووژل. هند د دې پېښې مسوولیت پر پاکستان پورې کړ. اسلاماباد دې پېښه کې لاس لرل رد کړل او خبرداری یې ورکړ چې د هند د برید په ځواب کې به په شدت سره عکسالعمل وښيي.
