سلام وطندار ته رسېدلي اسناد ښيي چې یوې پېژندل شوې څېرې، پخواني پوځي چارواکي او له فراه ولایته ولسي جرګې ته نوماند عبدالستار حسیني د فراه د پخواني والي محمد آصف ننګ د ترور نیت، د فراه – فراهرود په لویې لارې د پوځیانو په برمته، د غیرمسوولو وسلهوالو کسانو په لرلو، د دولتي ځمکو په غصب او خرڅلاو، قاچاق، له قاچاقچیانو ملاتړ، د خپل ماموریت پرمهال د دندې له صلاحیتونو په ناوړه ګټه اخېستنه، د قاچاقچیانو پهواسطه له کومې ستونزې پرته د بازارچې کلیدي پوستو مسوولان تهدیدول چې پهدې مسیر تګ ـ راتګ وکړای شي، د لاریونونو کول او د حکومت او نظام په سبوتاژولو تورن دی. خو لهدې هر څه سره لا هم ښاغلی حسیني له فراه نه ولسي جرګې ته د مخکښو نوماندانو په کتار کې ولاړ دی.
د فراه د پخواني والي محمد آصف ننګ له لوري دوه کاله وړاندې مرکزي حکومت او سیمهيیزو ارګانونو ته په لېږلي لیک او راپور کې را غلي چې هغه د ۱۳۹۵ کال د دلوې پر ۲۱مې نېټې د نیمروز د پخواني والي سرور ثبات د زوی د فاتحې مراسمو ته لاړ. د ده په وینا، مخکې لهدې چې جومات ته ننوزي؛ د جومات شاوخوا یې د بامونو پر سرونو په کمیین کې په سپکو او درنو وسلو سمبال کسان ولیدل؛ خو د فني ستونزو له امله د یو وسلهوال وسله بنده شوه او پهخپل پلان کې ناکامېږي. د ده په وینا، په ورته وخت کې محافظین او سپینږیري ده ته سپر کېږي او جومات ته یې دننه کوي.
.jpg)
ښاغلي ننګ پهدې رسمي لیک کې ادعا کړې چې دا سوء قصد د عبدالستار حسیني له لوري پلان شوی و. د فراه پخواني والي د دې راپور په یوې برخې کې عبدالستار حسیني د غیرمسوولو وسلهوالو په لرلو، د ایران له استخباراتي کړیو سره په اړیکه ساتلو، د نشهیي توکیو په قاچاق، د دولتي ځمکو په غصب او خرڅلاو تورن کړیدی.
محمد آصف ننګ ـ چې اوس د لغمان والي دی ـ وايي، ده باندې د شوي وسلهوال برید څرنګوالی یې کشفي ارګانونو، ملي امنیت، د ملي امنیت څارنوالۍ او عدلي او قضایي ارګانونو ته شرح کړی؛ خو تر اوسه یې وروستۍ پایله نهده معلومه شوې. د ښاغلي ننګ په وینا، که څه هم پر ده د وسلهوال برید دوسیې د نه تعقیب او نه پاملرنه روښانه نهده؛ خو داسې ښکاري چې تر شا یې د ځېنو څېرو لاسونه شته دي.
د دې مکتوب ترڅنګ د ملي دفاع وزارت د کشف ریاست د ملي امنیت شورا ته په استولي مکتوب کې راغلي چې عبدالستار حسیني د فراه او فراهرود په لویې لارې پوځیان اختطاف او برمته کړي.
د دې اسنادو یوه بله برخه ښيي چې ښاغلی عبدالستار حسینی د لویدیځ زون د کشف مرستیال په توګه، د دندې پرمهال، د دندې د صلاحیتونو څخه په استفادې سره یي ځېنې قاچاقچیان خوشې کړي او قاچاقي توکي یې حیف او میل کړيدي.
د دې ترڅنګ ځېنې نور اسناد ښيي چې د ۱۳۹۷/۴/۸ نېټه د فراه ولایت د نظامي څارنوالۍ ریاست د هرات سرحدي پولیسو ۷۰۵ زون قوماندانۍ ته هدایت ورکړی چې ځېنې نظامیان د تحقیق د بشپړولو په موخه ور وغواړي چې په هغو کې د لویدیځ زون د کشف مرستیال عبدالستار نوم هم لیدل کېږي.
د فراه د ملي امنیت څارنوالۍ رییس خلیلالله امیني وايي چې د فراه د پخواني والي ښاغلي آصف ننګ د ادعا او هدایت لهمخې یې عبدالستار حسیني د ترور په تور ونیولو؛ خو د دوی د څېړنو په پایله کې تورونه ثابت نهشول. ښاغلی امیني دغه موضوع ـ چې عبدالستار حسیني د فراه د ملي امنیت ریاست په لاسنیوي خوشې شوی ـ په کلکه ردوي.
ښاغلی امیني دا یوه سیاسي موضوع او تشه ادعا ګڼي.
عبدالستار حسیني، د تورونو، قانونماتولو او له وظیفوي صلاحیتونو په ناوړې ګټنې سره ـ سره بیا هم له فراه ولایته د ولسي جرګې څوکۍ ته ځان نوماند کړ، چې په هغه ډله نوماندانو کې را ځي چې تر ټولو مخکښ دي.
ځېنو سرچینو سلام وطندار ته وویل، د ټاکنو شکایتونو کمېسیون ته د غیرقانوني کړنو، د غیرمسوولو وسلهوالو لرلو، له قاچاقیانو سره مرسته، د د ندې له صلاحیتونو استفاده او د پخواني والي د ترور قصد په اړه شکایتونه لېږل شويدي.
خود ټاکنو د شکایتونو کمېسیون ویاند عليرضا روحاني له سلام وطندار سره په خبرو کې وویل چې د دوی ولایتي دفترونو ته د ټاکنو اړوند شکایتونه له رسېدو سره هممهاله څېړل کېږي او هڅه کېږي چې مجرم شخص د قانونو لارو له نوملړه وغورځول شي.
ښاغلی روحاني زیاتوي چې تر اوسه دوی ته له ۱۲ زرو ډېر شکایتونه رسېدلي او دوی د دې شکایتونو د څېړلو په حال کې دي.
د ښاغلي حسیني پر دوسیې د کار پرمهال داسې اسناد هم لاسته راغلل چې ښيي عبدالستار حسیني پهدې ورستیو کې د ۱۳۹۷ /۸/ ۲۹ نېټه د درېیوو تنو د نیولو امر کړیدی او غوښتل یي له هغو نه په جبري توګه اعتراف واخلي. خو د محمدحسین په نوم یو شخص د ښاغلي حسیني لهدې کار سره مخالفت کوي او هڅه کوي چې د حسیني کسانو له شکنجې وتښتي؛ خو د عبدالستار حسیني د ورور (عبدالجبار حسیني) لهخوا د مرمۍ په فیر کولو سره وژل کېږي.
ومو غوښتل پهدې اړه د فراه امنیه قوماندانۍ نظر هم واخلو؛ خو د دې ولایت امنیه قوماندان رحمتالله صدیقي د سلام وطندار د تحقیقي برخې خبریال د لومړي ځل ټیلیفون ته ځواب ورکړ او له هغه یې د جزیاتو د ورکولو په پار وخت وغوښت؛ خو له وخت تېرېدلو وروسته په پرلهپسې اړیکو کې له وصلېدو وروسته د مخابرې او محیط غږونه خپرېدل او خپله یې خبرې نهکولې.
خو عبدالستار حسیني پر ده د ټولو تورونو په رد سره وویل، دا چې ده په نظام کې ښه وخت تېر کړی او لوی قاچاقبران یي نیولي؛ دغه دسیسې ورته جوړې شوېدي. د ښاغلي حسیني په خبره، د سرور ثبات په نامه یو شخص ـ چې پخوا د نیمروز والي وو ـ د پخواني ولسمشر حامد کرزي په حکومت کې د نفوذ او د پخواني دفاع وزیر سره په ملګرتیا سره یې دغه دوسیې جوړې کړېدي.
ښاغلي حسین وویل، زه د محکمې او خلکو پر وړاندې حاضر دی چی ما د ذره ـ ذره کار حساب ورکړي.
بلهخوا سرور ثبات ـ چې په پخواني حکومت کې د نیمروز والي او د ملي امنیت شورا کارکوونکی وو ـ وايي چې په څووو دولتي ادارو کې د څوو جعلي دوسیو جوړول د یو شخص د وسې کار نهدی.
د ثبات په خبره، له ښاغلي عبدالستار حسیني سره هېڅ ډول دوښمني نهلري چې د هغه پر وړاندې دوسیه جوړې کړي.
د عبدالستار حسیني دوسیه یوه له هغو زرګونو دوسیو څخه ده چې د امنیتي، عدلي او قضایي بنسټونو ترمنځ لاس په لاس کېږي او رسېدنه ورته نهکېږي.
