د مارچ ۸ یا د ښځو نړېواله ورځ په داسې حال کې لمانځل کيږي، چې اوس هم په افغانستان کې د ښځو پر د زور زیاتي کچه ورځ تر بلې مخ په زياتېدو ده.
د ښځو چارو وزارت د پلان او پالیسۍ مشره رحيمې ظریفي سلام وطندار ته وویل، سږکال د ښځو پر وړاندې د تاوتريخوالي ۴۰۰۰ قضيې ثبت شوي دي او دغه شمېره د تېره کال په پرتله زياتوالی ښيي.
مېرمن ظریفي وايي، چې یواځې د يادې شمېرې ۹۸ سلنه له وخت وړاندې ودونه، طلاق، کورنی تاوتريخوالی، قتل او تجاوز قضيې جوړوي.
نوموړې زياته کړه، چې د ښځو پر وړاندې د تاوتريخوالي په موخه مبارزه کول يواځې د دولت کار نه دی او باید دغه مبارزه کې عام وګړي هم مرسته وکړي.
دښځو چارو وزارت دغه چارواکې زیاتوي، دولت يواځې کولای شي، چې دعامه پوهاوي، د قانون پلي کول، له فساد سره مبارزه او امنیت په برخو کې د خپلو هېوادوالو سره مرسته وکړي.
سرچينه مخکې وايي، که چيرې عام خلک په دغه برخه کې مرسته ونه کړي، نو دولت به په يواځې توګه بریالی نه شي او د تاوتريخوالي کچه به لکه د سږکال په شان ورځ تر بلې زياتوالی و مومي.
همدارنګه ځينو د ښځو چارو فعالانې د تاوتريخوالي د کچې له زياتوالي اندېښنه څرګندوي او وايي، چې مونږ به د لنډ مهالې او د پروژوي مبارزو په پلې کولو سره و نه شو کولای، چې د ښځو پر وړاندې د زور زیاتي مخنيوی وکړو.
د ښځو د ټولنې مشره مهناز صادقي سلام وطندار ته وویل، چې د ښځو پر وړاندې د تاوتريخوالي کچه لوړه شوې، چې په دغه برخه کې د سړک پر غاړې د ښځو ازارول ښه بېلګه په ګوته کېدلی شي.
صادقي زياتوي، چې اوس مهال د ښځو پر وړاندې د تاوتريخوالي د مبارزې لپاره پروژې اخيستل کيږي او دغه لنډ مهالې پروژې او سيمينارونه نه شي کولای، چې د تاوتريخوالي مخه ونيسي.
مېرمن صادقي وايي، چې تاوتريخوالی د ښځې او خاوند په منځ کې د يو بل د حقوقو د نه پېژندلو په پایله کې منځ ته راځي او باید په دغه برخه کې ډير کار وشي.
دغه فعالانې وايي، د ښځو پر وړاندې د تاوتريخوالي په برخه کې، چې دولت تر اوسه مبارزه کړې ښه پایله يې نه درلوده او باید په دغه برخه د دولت له لورې رغنده ګامونه پورته شي.
اخوا بيا د ښځو د حقونو بلې فعالې تورپېکۍ سلام وطندار ته و ویل، چې د ښځو پر وړاندې د تاوتريخوالي د کچې لوړېدلو عمده لاملونه دودیزه ټولنه او د خپل خاوند د حقوقو په اړه د ښځې معلوماتو نشتوالی دی.
تېره پنجشنبه د مارچ په ۵ د ښځو نړېوالې ورځې په مناسبت ولسمشر غني یوځل بیا ټینګار وکړ، چې په ټولنه کې به د افغان ښځو د رول په برخه کې بنسټیز بدلون راولي.
ولسمشرمحمد اشرف غني وویل، حکومت ژمن دی چې د افغان ښځو تېرې ۱۳ کلنې لاسته راوړنې خوندي او پیاوړې کړي.
غني زیاته کړه ، چې په راتلونکي کې به د ښځو لپاره يو ځانګړی پوهنتون په کابل کې جوړوي او نور به په دولتي ادارو کې د ښځو پر وړاندې تاوتریخوالي ته اجازه ور نه کړي.
