د افغانستان د سولې، عدالت او ازادۍ غورځنک نن په کابل کې د ۲۰۹ شاهین قول اردو د پېښې قربانیانو روح ته د دوعا مراسم نیولي وو.
د دې مراسم ګډونوالو د امنیتي ځواکونو له وړتیاوو ستاینه وکړه او ویې ویل، چې افغان امنیتي ځواکونه په کافي اندازه امتیازات نه لري.
دوی وايي، سره له دې چې امنیتي ځواکونه د سر په بیه له خاورې دفاع کوي؛ خو حکومت ورته لازم او کافي اندازه امتیازات برابر کړي نه دي او په ډېرو سختیو کې ژوند تېروي.
په دې مراسمو کې د ولسي جرګې وکیل عبداللطیف پدرام وویل، عسکري سپېڅلې او د هېوادنۍ مینې انتها ده، خو په افغانستان کې له سرتېرو د نقلیه وسایطو په ټوګه استفاده کېږي او دغه راز د ملي دفاع وزارت په لوړو پوستونو کې سلیقوي ګومارنې کېږي.
پدرام وايي، هغه سرتېري چې د جګړې اولې کرښه کې دندې لري پېژندګلوي نه لري له همدې امله تراوسه د رتبې د ارتقا لهپاره ثبت شوي نه دي او د دویمه درجه سرتېري په حیث ورته کتل کېږي.
پدارم وویل: "سرتېری یم، د وطنوالي حق نه لرم، جنرالۍ ته د ارتقا امکانات نه لرم، جسد مې خپل ولایت ته نه لېږدول کېږي پروینايي دا د شاهي نظام چارو او چلند ته ورګرځي."
په ورته وخت کې د سیاسي چارو شونکي احمد سعیدي هم په دې وروستیو کې په دولتي ادارو کې په ګومارنو نیوکه وکړه او ویې ویل، چې په لوړو دولتي ادارو کې د سلیقې په اساس ګومارنه کېږي.
په ورته وخت کې د ملي دفاع وزارت د ویاند مرستیال محمد رادمنش دغه موضوعات رد کړل او سلام وطندار ته یې وویل، د ملي دفاع وزارت په ګومانو کې هېڅ ډول قومي تعصبات نه دي پالل شوي.
رامنش وايي، د قانون له مخې ټولو امنیتي ځواکونو ته یو ډول امتیازات ورکول کېږي.
