قدیم زمانلردن تا هنوزگچه ییتیب کیلگن بو نان رمزی معنالرنی هم انگلب عزیز مهمان و توی دسترخوانینینگ کورکی حسابلنگن. دسترخوانده پتیر بولسه مهماندارچیلیک اوچون مخصوص تیارگرلیک کورلگنینی انگلتن.
اونی کته قیلیب یَسب، یاپیلیشی کوپچیلیک تامانیدن استعمال ایتیلیشیگه مولجللنگنی بیلدیرهدی. نکاح تویلری آلدیدن کیاو تامان قودهلر البته پتیر یاپیب کیلگنلر.
دسترخوانده پتیر اوشهتیلیشی، قیز تامانینینگ تویگه راضیلیک علامتینی بیلدیرگن. ایلیق سوتده خمیرتوریش و توزنی ایریتیب، داغلب ساووتیلگن قوی یاغی یاکه سرییاغ قوشیب یخشیلب ارهلشتیرهسیز. سونگره آز – آزدن اون سالیب قتیق خمیر قارهسیز، اوزاق مددت مشتلب پیشتگنیگیزدن سونگ اورهب ایسیقراق جایده آچگونچه قالدیرهسیز. کوپینچه خمیردن 500 گراملی بولکلر اوزیب آلیب، زوالهلر یسلهدی.
هر بیر زوالهنی تخته اوستیگه قوییب تیلیب کنگره سالهسیز، تیپهسینی هم کیسیشمه چیقیزیقلی قیلیب تیلیب چیقهسیز. انه شوندهی تیارلنگن زوالهلرنینگ تیپهسیدن مشت بیلن ایزیب، سونگ برماقلرنی چقان ایشلهتیب لگن کتهلیگیده نان یَسیسیز.
ناننینگ چیتلری 3- 4 سانتی متر قلینلیکده، اورتهسی ایسه 1 سانتی متر کیلهدیگن بولسین. اورتهسیگه جوده زیج قیلیب چیکیک اورهسیز و یوزیگه سیهدانه سیپهسیز. همه زوالهلردن پتیر یسب بولگچ،، یوزیگه دسترخوان یاپیب 15 – 20 دقیقه تیندیریب قویهسیز.
شو مددت ایچیده تندیرگه اوت یاقیب قیزیگچ، چوغنی اورتهگه توپلب، اوستیگه کول تارتهسیز، تندیر دیوارلریگه و پتیرنینگ تیسکری تاماینگه سوو اوریب چققانلیک بیلن یاپیشتیرهسیز. پتیر تندیرده آبی نانگه قرهگنده اوزاقراق اوشلنهدی. یاپیلگن ناننینگ سیرتی بیر آز قاتگنده بوغ حاصل بولیشی اوچون سوو سیوهلیسیز و چوغنینگ یوزینی آچهسیز، بعضن تندیرنینگ قاپقاغینی بیر آز مددت بیرکیتیب دملنهدیر.
پیشگنلیگی سیرت قیزلرگندن انیقلنهدی. تندیردن اوزیب آلگچ ایسغیده یوزیگه بیر بولی ایریتیلمهگن دمه یاغی سورتسنگیز چیراییلی چیقهدی.
