لیږونکی: په پاکستان کې د سلاموطندار خبریال؛ سراج علي
د پاکستان استازي وايي، چې د هېواد د څارګرې ادارې مشر به يې په راتلونکو څو ورځو کې کابل ته ورشي او د ځينو افغان لوړ پوړو چارواکو سره به لیدنې هم وکړي.
د پاکستان د سیاسي ګوندونو او پارلماني خونو غړو له کابل سفر وروسته په هغه هیواد کې رسنيو ته د دغه سفر څخه خبر ورکړی.
د پاکستان د ولسي جرګې منشي ایاز صادق کابل ته د پاکستان د پارلماني پلاوي له سفر وروسته د رسنيو سره په خبرو کې خپل دغه سفر ګټور وباله او زیاته یې کړه، چې په دې ډول تګ راتګ سره به د دواړو هیوادونو ترمنځ تاوتریخوالی کم شي.
ایاز صادق وايي، چې د کابل او اسلام اباد ترمنځ د اړیکو ښه کېدو لهپاره به په نږدې ورځو کې د پاکستان د استخباراتو مشرجنرال نوید مختار هم افغانستان ته په یو سفر لاړ شي.
کابل ته د پاکستان د استخباراتو د مشر جنرال نوید مختار د سفر په اړه د پاکستان پوځ متقاعد ډګروال نذیر خان وویل، چې روانه جګړه استخباراتي ده، نو د استخباراتو ترمنځ ریښتيني همکاري او باور پیدا کول د اړیکو په ښه کېدو کې یو لوی ګام کیدلی شي.
هغه وايي، چې اوسنی جنګ ټول استخباراتي جګړه او په دې کې استخباراتي تعلق، اعتبار، پيشکي اطلاع ورکول او د ترهګرو په اړه معلومات يو بل سره شريکول ضروري دي.
د نوموړي پر خبره، د آې، ایس، آې د مشر دوره یو لوی مثبت ګام بلل کېدای شي.
په ورته وخت کې د امنیتي مسایلو کارپوه جاوید کوهستاني سلام وطندارسره په خبرو کې وویل، ضرورت د دې خبرې دی، چې دواړه هیوادونه د باور فضا رامنځته کولو له پاره عملي کار وکړي.
کوهستاني همدا ډول وایي، په دې برخه کې پاکستان ته پکار دي چې د باور فضا رامنځته کولو لهپاره د ترهګرو ډلو په خلاف ګامونه پورته کړي.
کابل ته د پاکستان د استخباراتو د مشر د سفر خبر داسې مهال ورکول کیږي، چې یواځې څو ورځې وړاندې ددغې هیواد د پوځي چارواکو څخه جوړ یو پلاوي افغانستان ته سفر کړی و او د لوړپوړو افغان پوځي چارواکو سره یې کتلي وو.
تر اوسه افغان چارواکو کابل ته د پاکستان د استخباراتو د مشر جنرال نوید مختار د سفر په اړه رسنيو ته څه نه دي ویلي.
