افغانستان تینچلیک لایحهسی آمریکا تشقی ایشلر وزیرلیگینی خاص نمایندهسی زلمی خلیلزاد و پاکستان باش وزیری عمران خان، یکشنبه کون (31- سنبله) نیویارک ده اوچرهشگن.
اوشبو اوچرهشووده پاکستان باش وزیری عمران خان، طالبان بیلن آمریکا سوزلشوولری قیتهدن باشلهنیشی توغریسیده امید بیلدیرگن.
پاکستان رادیوسی تامانیدن بیریلگن گزارش گه کوره، عمران خان افغانستانده تینچلیک تأمینلنیشی خصوصیده بولگن سعی و حرکتلردن مملکتی حمایت قیلیشی توغریسیده ایشانچ بیرگن. اونینگ اورغولشیچه، افغانستان قیینچیلیگی نینگ ییچیم یولی اوروش ایمس دیر.
جناب خلیلزاد حاضرگچه بو توغریده هیچ نرسه دیمهگن.
پاکستان باش وزیری بیرلشگن ملتلر تشکیلاتی نینگ عمومی ییغینیده قتنهشیش اوچون نیویارک بارگن.
افغانستان تینچلیک لایحهسی بوییچه آمریکا تشقی ایشلر وزیرلیگینی خاص نمایندهسی زلمی خلیلزاد، کمیده 10 آیده، 9 مرته طالبان نمایندهلری بیلن قطرنینگ دوحه شهریده سوزلشگن.
اوشبو سوزلشوولرنی 9- دوری ده آمریکا و طالبان آرهسیده تینچلیک کیلیشوونامهسی نینگ متنی نهایی بولدی. بیراق، ایکی هفته آلدین، آمریکا جمهور رئیسی دونالد ترامپ، کابل شهریده طالبان تامانیدن اویوشتیریلگن هجوم ده آمریکاییلیک بیر عسکر هلاک ایتیلگنی باعث، تینچلیک سوزلشوولرینی بیکار قیلدی.
عین حالده، قطردهگی طالبان گروهی نینگ سیاسی دفتری، مذکور گروه نینگ 9 کیشیلیک بیر هیأتی ملاعبدالغنی برادرنینگ ایتکچیلیگیده چین گه سفر قیلگنیدن خبر بیرگن.
قطرنینگ دوحه شهریده آمریکا و طالبان آرهسیدهگی تینچلیک سوزلشوولری توختهتیلگنیدن سونگ، بو طالبان هیأتی نینگ باشقه مملکتلرگه بولگن اوچینچی سفری دیر.
اوتگن هفته طالبان گروهی نینگ بیر هیأتی روسیه و باشقه بیر هیأتی ایران باریشگن.
تینچلیک سوزلشوولری ترامپ تامانیدن لغو ایتیلدی
تینچلیک سوزلشوولری توختهتیلگنیدن سونگ، طالبانگه قرشی حربی هجوملر شدتلنگن
قطردهگی طالبان گروهی نینگ سیاستی دفتری سوزلاوچیسی سهیل شاهین، اوز توییتر صحیفهسیده یازیشیچه، قطردهگی طالبان گروهی نینگ سیاسی دفتری مسؤولی ملاعبدالغنی برادر، یکشنبه کون (31- سنبله) افغانستان ایشلری بوییچه چین نینگ خاص نمایندهسی دینگ شیجون بیلن بیجینگ ده اوچرهشگن.
جناب شاهین نینگ ایتیشیچه، اوشبو اوچرهشووده دینگ شیجون، طالبان گروهی بیلن آمریکا کیلیشیشینی افغانستانده دوام ایتیب کیلهیاتگن اوروش یکونلنیشی خصوصیده، یخشی بیر ورینت دیب و بوندن چین نینگ حمایت قیلیشینی ایتگن.
قطردهگی طالبان گروهی نینگ سیاسی دفتری سوزلاوچیسی، توییتریده طالبان گروهی نینگ سیاسی مسؤولی ملاعبدالغنی برادر دن نقل قیلیب یازیشیچه، ترامپ بیرگن سوزی گه عمل قیلمهگن صورتده، بوزغونچلیک و توکیلهدیگن قانلرگه مسؤول بولهدی.
شونینگدیک، ملاعبدالغنی برادر دن نقل قیلیب جناب شاهین نینگ ایتیشیچه، «بیز افغانستان مسئلهسی حل ایتیلیشی اوچون مذاکره قیلدیک و هر تامانلمه کیلیشووگه ایریشدیک. حاضر ایسه، آمریکا جمهور رئیسی بیرگن سوزلریگه عمل قیلمهگن صورتده، بوندن کیین هرقندهی توکیلهدیگن قانلر و بوزغونچیلیکلرنینگ مسؤولیتی اونینگ بوینیگه بولهدی.»
چین رسمیلری حاضرگهقدر بو توغریده فکر بیلدیرمهگن.
بیراق، تینچلیک ایشلری بوییچه دولت وزیرلیگی، طالبان هیأتی نینگ چین گه قیلگن سفری گه عکسالعمل بیلدیریب ایتیشیچه، بو گروه نینگ باشقه مملکتلرگه قیلگن سفرلری، افغانستان اهالیسی کوتگن نتیجهنی بیرمهیدی.
مذکور وزیرلیک مسؤوللری نینگ میدیالرگه ایتیشیچه، طالبان هیأتی باشقه مملکتلرگه سفر قیلیش اورنی گه افغانستان حکومتی بیلن مذاکره قیلیشی کیرهک.
شو توغریده…
تینچلیک سوزلشوولری خصوصیده بولگن ناانیقلیکلر اهالینی خواطرگه سالگن
