یَشیل حرکتی نینگ اعضالری و بیر قنچه کابللیکلر بوگون (جمعه) اوتگن هفته افغانستانده عملگه آشیریلگن انتحاری هجوملرگه عکس العمل بیلدیریب پاکستان ایلچیلیگی قرشیسیگه یول یوریب بارگنلر. اعتراضچیلر کابل، هلمند و قندهار ولایتلریده صادر ایتیلگن قانلی حادثهلرده بی واسطه پاکستاننینگ قولی بارلیگینی ادعا قیلگنلر.
پاکستانگه قرشی شعار بیرگن اعتراضچیلر، کوپینچه ترورچی و انتحاری هجوملرنی صادر قیله دیگن گروهلر پاکستان توپراغیده تربیهلنیب افغانستان یوباریلهدی دیگنلر. نمایشچیلر پاکستان حکومتیدن تینچ اهالینی اولدیریشنی توختهیشنی سورهگنلر.
شونینگدیک اعتراضچیلر رسمی اسلام آباد – کابل علاقهسی یخشی لهنیشی اوچون افغانستان و پاکستان اورتهسیده معین بیر لایحه انابتگه آلینیشی اوستیده تاکید قیلگنلر. نمایشچیلر حکومتدن اسلام آباد نینگ ایلچیخانهسی باغلهنیشین ایستهگی بیلن چیققنلر.
نمایش اداغیده قطعنامه صادر قیلگن اعتراضچیلر، پاکستانده ترورچیلیک فعالیتلرگه عاید خذمت قیله دیگن ایریم مدرسهلر پاکستان ملی اردوسی طرفیدن باغلهنیشینی طلب قیلگنلر. بیرلشگن ملتلر تشکیلاتی هم دایم پاکستان مسالهسی اوچون بیفرق قالگن دیگن اعتراضچیلر.
اوتگن بیر کونده قوراللی طالبلر هلمند، کابل و قندهار ولایتلریده اوچ انتحاری هجوم صادر قیلگن ایدی. بیرینچی پارتلش هلمند ولایتیده قوم بویوکلریدن بیرینینگ اوییده یوز بیرگن. بو حادثه ده 7 کیشی قربان بولیب 4 نفر یره لگندی. بو واقعهدن نیچه ساعت اوتمی کابل نینگ دارلالمان یولیده ملی امنیت ادارهسی نینگ خادملری نشانگه آلینیب کیمده 25 انسان حیاتدن کوز یومدی.
پارتلش ده 70 دن آرتیق انسان یره دار بولدی. لیکن بو ایش نینگ آخیر بولمهدی. کیچه ساعت 7 ده قندهار ولایت والیسینینگ مهمانخانهسیده کوچلی پارتلش روی بیردی. اوشبو پارتلشده بیرلشگن عرب امیرلیگی نینگ بیش دیپلوماتی داخل 12 کیشی قربان بولیب و 14 نفر ایسه یرهلندی.
