صابر حسیني شاوخوا نهه میاشتې مخکې د یو ګرځنده کتابتون نوښت وکړ او په بایسکل باندې یې ځوانانو او ماشومانو ته د کتابونو ګرځول پیل کړل. د نړۍ یو مشهور برازيلي لیکوال پاولو کو ئیلو په خپلې ټویټر پاڼې د ټولنیزو رسنیو له کاروونکیو غوښتي، چې صابر حسیني ته د ده د ټولو اثارو په رسولو کې له ده سره مرسته وکړي.
د کوئیلو له اثارو سره تقریباً ډېر خلک اشنا دي او مشهور اثار یې «کیماګر»، «پلرونه، زامن او لمسیان» او «رونیکا پرېکړه کړې چې مړه شي» دي. د کوئیلو اثار د نړۍ په ۵۶ ژبو ژباړل شوي دي او ۱۵۰ نه په زیاتو هېوادونو کې خپاره شوي دي.
صابر حسیني له سلام وطندار سره په خبرو کې وویل، د دې خبر په اورېدلو خوشاله دی او دا چې ورځ تر بلې د ده کار ته لیکوالان او فرهنګيان پاملرنه کوي؛ راتلونکې ته ډېر هیله من دی. هغه د ټولنیزو رسنیو له کاروونکیو وغوښتل چې د ده او پالو کوئيلو ترمنځ د اړیکي ونډه ادا کړي، چې کتابونه یې تر بامیانو راورسېږي.
د حسیني ګرځنده کتابتون د شعر، داستان او انځورګرۍ په اړه شاوخوا ۲۰۰ کتابونه لري. هغه دا کتابونه د بایسکل پر زین او کنجوغه په یو صندق کې ږدي او د بامیانو پر ۱۱ منطقو ګرځوي.
حسیني د هېواد د فرهنګیانو په مرسته د شهیدان په سیمه او د دې ولایت په یکولنګ ولسوالۍ کې ۵ کتابتونونه جوړ کړي دي.
هغه زیاتوي، تر اوسه چې يې کومې لاسته راوړنې او مثبتې پایلې ترلاسه کړي؛ نو ډېر ژر به د افغانستان د نورو ولایتونو د اوسېدونکیو په غوښتنه، نورو ښارونو او کلیو ته هم دا لړۍ وغځوي.
حسني په دې باور دی، چې نه زغم، یو بل نه منل، بې سوادي او د کتاب نه لوستنې فرهنګ په افغانستان کې د بې اتفاقۍ او بدبختۍ اصلي لاملونه دي او پوهه هغه وسله ده، چې افغانستان په نړۍ کې د یو ښه هېواد په توګه معرفي کولی شي.
