ټاکنې؛ اختلافونه درغلۍ او سیاسي لاسوهنې ته زمینه برابروي

د افغانستان ازادو او عادلانه ټاکنو بنسټ یا فیفا وایي چې د ولسي جرګې ټاکنو په اړه د ټاکنو او شکایتونو کمېسیونونو ترمنځ اختلافونو درغلۍ او سیاسي لاسوهنې ته زمینه برابره کړه.

د فیفا مشر یوسف رشید نن کابل کې خبري غونډې ته وویل چې د دواړو کمېسیونونو ترمنځ اختلافونه او نه همغږي د ناوړې ګټنې لامل شول.  

د ښاغلي رشید په وینا، د دواړو کمېسیونونو ترمنځ تقابل ولسي جرګې ته د رایه ورکوونکیو نوم‌لیکنه، وطنوالو او نوماندانو ته ټاکنیز عدالت تر پوښتنې لاندې راووست.

د فیفا رییس زیاتوي، په دواړو کمېسیونونو کې پرېکړې ضد او نقیضې دي او د ټاکنو کمېسیون سره له همغږي پرته د شکایتونو کمېسیون له لوري د کابل رایو باطلول، د دغه ټکر ښه بېلګه ده. 

له بله‌پلوه د ټاکنو خپلواک کمېسیون مرستیاله ویانده کبرا رضایي وایي چې په ټاکنو کې هر ډول تقابل د خلکو او حکومت په ګټه نه‌دی.

د مېرمن رضایي په وینا، دوی هڅه کوي په یو سوله‌ییز بهیر کې ملي ګټو ته په پام سره د شکایتونو کمېسیون رایې تفتیش او بیا وشماري.

په‌دې اړه مو د ټاکنیزو شکایتونو کمېسیون د نظر اخېستلو هڅه هم وکړه؛ خو له پرله‌پسې هڅو سره ـ سره بیا هم ونه توانېدو.