د ولسي جرګې د کار له پیل نه د یوې میاشتې په تېرېدو د جرګې غړي لا هم نهدي توانېدلي چې د ولسي جرګې رییس غوره کړي او د ریاست څوکۍ پر سر رامنځته شوې شخړه لا هم دوام لري.
خو له دې سره سره د ولسي جرګې غړیو د ثور میاشتې معاش اخیستی چې دغه موضوع د جرګې د یوشمېر نورو غړیو له کلکو نیوکو سره مخ شوې ده.
یوشمېر وکیلان وايي، جرګې په تېره یوه میاشت کې هېڅ ګټور کار نهدی کړی او په بېکارۍ کې د معاش اخیستل د شرم وړ دي.
د ولسي جرګې غړې بلقیس روشن وايي، د رییس څوکۍ پر سر ستونزې لامل شوي چې ولسي استازي د افغانانو لپاره هېڅ ډول کار و نهکړي. د نوموړې په وینا، وکیلانو په تېره یوه میاشت کې کار نه، بلکې لانجې کړي، خو معاش یې بیا په بېشرمۍ اخیستی دی.
د ولسي جرګې بل غړی سید حسن پکتیاوال هم وايي چې ولسي استازیو په تېره یوه میاشت کې هېڅ داسې کار نهدی کړی چې باید معاش یې ترلاسه کړي.
د هغه په وینا، په جرګه کې روان وضعیت د افسوس وړ دی او د ولسي جرګې د غړیو حقونه باید د جګړې قربانیانو ته ورکړل شوي وای.
د ولسي جرګې اوسني وضعیت ته په کتو داسې ښکاري چې دا جرګه به په لنډ وخت کې له اوسنیو ستونزو را ونه وځي.
د یادونې وړ ده چې د ولسي جرګې د هر غړي میاشتنی معاش او امتیاز ۲۴۰ زره افغانیو ته رسېږي.
