د حکومت له لوري د څو ورځني اوربند او ورپسې د اختر په مناسبت د طالبانو لهخوا له درې ورځني اوربند وروسته طالبان د اختر په شپو او ورځو کې پلازمېنې کابل او د یوشمېر ولایتونو ښارونو ته راننوتل او د ښار له ګڼو ګوڼو ډکو سیمو کې یې خپل بیرغونه نصب کړل.
خلکو هم ورسره سلفي انځورونه واخیستل او تود هرکلی یې ځنې وکړ.
ښارونو ته د طالبانو دغسې راتلل او له هغوی د خلکو دغهشان هرکلی لامل شو څو ولسمشر تېره ورځ د «هلمند سولهغوښتونکیو کاروان» سره لیدنه کې ان تر یوکال پورې د اوربند د تمدید ژمنه وکړي.
ورته وخت کې د ولسي جرګې ځېنې غړي هم د حکومت او طالبانو ترمنځ له اوربند هرکلی کوي او له ولسمشره غواړي یو اړخیزه سوله تمدید کړي؛ د خبرو او د طالبانو ځواب ترلاسه کولو لهپاره یو پلاوي ته دنده وسپاري.
د ولسي جرګې غړی عبیدالله بارکزی وايي، حکومت باید زموږ له وروڼو سره یو اړخیزه سوله تمدید کړي.
د ولسي جرګې بل غړی نادرخان کټوازی د درې ورځني اوربند له تمدید هرکلی کوي. وايي، هغوی چمتو دي د سولې پیغام لېږدولو او د اوربند دوام په موخه د خبرو لهپاره، ټول هېواد ته سفرونه وکړي.
اخوا د ولسي جرګې مشر عبدالروف ابراهیمي وايي، درې ورځنی اوربند بېمخینې او د افغانانو لهپاره یو ښه خبر و چې د ټولو په زړونو کې یې سولې ته د رسېدو هیلې ژوندۍ کړې.
د ښاغلي ابراهیمي په وینا، د ولسي جرګې غړي هر هغه ځای کې چې د ملي ګټو په ځانګړې توګه د سولې خبره مطرح وي؛ اتفاق نظر لري.
خو د ولسي جرګې ځېنې نور غړي د سولې عالي شورا په کړنو نیوکه کوي او وايي، دغې شورا له طالبانو سره د پردې ترشا خبرې کړي او جرګه یې اغفال کړې ده.
شاګل رضايي وايي، د سولې عالي شورا باید د سولې خبرو په تړاو د ځواب ویلو لهپاره ولسي جرګې ته ور وغوښتل شي.
لا روښانه نه ده چې کوم لوري ارګ، امریکایان، چینایان، پاکستانیان او یا هم د سولې عالي شورا په کومو وسیلو او ژمنو او په څه ډول طالبانو سره اوربند ته ورسېد.
ښارونو ته د طالبانو دننه کېدل له تصوره لرې خبره وه او اوس چې ځېنې یې ښارونو کې پاتې دي دا هم د پوښتنې وړ خبره ده.
له دې سره داسې ښکاري د ولسي جرګې ډېری غړی د اوربند راتلونکې او طالبانو سره د خبرو بهیر ته هیلهمند دي.
