د کندوز دشتارچي ولسوالۍ کې د افغان ځواکونو د دوشنبې ورځ برید چې د ځېنو طالبقوماندانانو په ګډون په کې ملکيانو ته هم مرګژوبله واوښته؛ د عامو افغانانو په شمول یې د ولسي جرګې د استازیو غبرګونونه هم راوپارول.
د ولسي جرګې یو شمېر غړیو د جرګې نننۍ غونډې کې د کندوز وروستۍ پېښه د ټولو قوانینو خلاف کړنه وبلله .
د جرګې مشر عبدالروف ابراهیمي وویل، سره لهدې چې برید کې د ملکيانو ترڅنګ طالبانو ته هم مرګژوبله اوښتې؛ خو په مدرسې برید کول د منلو وړ نهدی.
نوموړی زیاتوي، د پېښې د څرنګوالي په تړاو به سیمې ته د امنیتي او دفاعي چارو له کمېسیونه یو پلاوی ولېږي.
په ولسي جرګې کې د کندوز د خلکو استازي کمال ساپي وویل چې د کندوز د دشتارچي ولسوالۍ په مدرسې برید د افغانستان د ولسمشر، حکومت او د دې خاورې دوښمنانو کړیدی.
هغه همداراز وویل، حکومت کې دننه داسې کړۍ شته چې سوله نه غواړي او د جګړې په اوږدېدو کې خپلې ګټې ویني.
ښاغلی ساپی همدارنګه وايي، طالبان له ملکيانو ګټه پورته کوي او اړتیا ده دولت د دې کار مخه ونیسي.
.jpg)
کمال ساپی د کندوز د پېښې واقعیت بل څه بولي.
په ورته وخت کې کابل کې د ملکيانو د خوندیتوب او عدالت غوښتنې ډله، د یوې خبرې غونډې په ترڅ کې د کندوز په یوې مدرسې د هوايي برید غندنه کوي؛ وايي چې دولت باید د ملکيانو په منځ کې دوښمن په نښه نهکړي.
د دې ډلې غړی قریبالرحمان شهاب وویل، د کندوز پېښې د څېړلو په موخه د حکومت د غوره کړي پلاوي پر څېړنو باور ځکه نهلري چې حکومت څېړنې کوي؛ خو پایلې یې له ولس سره نه شریکوي.
اخوا دفاع وزارت ویلي، د کندز د دشتارچي ولسوالۍ برید کې د طالبانو ۱۸ لوړپوړي کورني او بهرني قوماندانان وژل شوي او ۱۲ نور ټپیان شوي.
خو طالبان بیا وايي، دې پېښې کې ملکیانو ته مرګژوبله اوښتې ده.
ولسمشرۍ ماڼۍ هم د ملي امنیت شورا د غړي خدایداد هزاره په مشرۍ یو پلاوی ټاکلی چې برید کې د ملکي تلفاتو په اړه پلټنې وکړي.
