د ولسي جرګې یو شمېر غړیو د هرات ولایت د جامع جومات خطیب مجیب الرحمان انصاري د څرګندونو په اړه غبرګون ښودلی او ویلي یې دي چې د دیني ارشاداتو په نوم افراطیت د منلو نه دی.
د ولسي جرګې غړیو دغه راز پر حکومت غږ کړی چې که د دغه شان څرګندونو په اړه بې غوري وکړي، ښايي په هېواد کې نوې افراطي ډلې رامنځته شي.
د ښځو د بد حجابۍ او د امر بالمعروف او نهی له المنکر ادارې د جوړونې په اړه د هرایت د یوه دیني عالم څرګندونو په ولسي جرګه کې د خلکو د استازیو او په بلخ ولایت کې د ښځینه فعالانو انتقادونه پارولي. د هرات دارالعلوم مسؤل مولوي مجیب الرحمان انصاري په دې وروستیو کې په هرات ښار کې بېلبورډونه نصب کړي او پرې لیکلي یې دي چې د ښځو بد حجابي د نرانو د بې غیرتۍ له امله ده.
د ولسي جرګې رييس میر الرحمان رحماني وايي، د افراطیت په نوم هېڅ شی د منلو وړ نه دي او ديني علما دې د شخصي قانون پر ځای د اساسي قانون پر چوکاټ کې عمل وکړي.
.jpg)
دغه راز د ولسي جرګې غړې بلقیس روشن د حج او اوقافو وزارت په بې کفایتۍ تورنوي او وايي چې د مذهبي چارو، د جوماتو او ملا امانانو څارنه د حج او اوقافو وزارت له دندو دي.
له بلې خوا په بلخ ولایت کې یو شمېر ښځینه فعالانو د هرات ولایت د جامع جومات خطیب د مجیب الرحمان انصاري وينا نامسوولانه ګڼي.
دوی وايي، نفاق اچوونکې څرګندونې او په ښار کې د ښځو ضد بېلبورډونو ځوړندول په هېواد کې د عامه نظم ګډوډولو لامل کېږي.
دا په داسې حال کې ده چې څو اوونۍ وړاندې د هرات ښار د ګازرګاه جامع جومات خطيب مجيب الرحمن انصاري ويلي وو، اخلاقي فساد د ډېرېدو په حال کې دی او هرکله چې کوم کس د اخلاقي فساد په تور ونيسي نو شرعي حکم به ورباندې جاري کوي.
په دې تړاو:
مجیبالرحمان انصاري: موږ د حکومت د بېپروايۍ له کبله اقدام وکړ
