افغان ولسمشر محمد اشرف غني د محرومیتونو له منځه وړلو په اړه وویل، تر څو چې خلک محروم وي، نو نظام نه ټینګېږي.
نوموړي زیاته کړه، چې عدالت د اسلام د مبین دین اساس دی او له عدالت پرته نه پرمختګ راځي او نه هم اردو او نظام جوړېدی شي.
د ارګ څخه په رالېږل شوې خبرپاڼه کې راغلي، چې ولسمشر غني شوراګانې ولسي، مدني او راضاکارانه بنسټونه وبلل او زیاته یې کړه، چې شوراګانې د مدني ټولنې اساسي خښتې دي او اوسمهال د هېواد بېلابېل شوراګانې د ولس باور او ملاتړ له ځانه سره لري.
جمهور رییس محمد اشرف غني د افغانستان د قومونو د شوراګانو له مشرانو او استازو سره د کتلو ترڅنګ دا هم وویل، چې د سولې، امنیت، ملي مشارکت، ښې حکومتوالۍ او د قانون د حاکمیت په برخه کې د ولسونو او مشرانو رول مهم وباله او له ټولو څخه یې هیله وکړه، چې د هېواد د امنیتي او دفاعي ځواکونو تر شا کلک ودرېږي او د دوی د بې درېغه سرښندنو او هلو ځلو قدرداني وکړي.
په دې غونډه کې په سیاسي چارو کې د جمهور رئیس ځانګړي استازي ډاکټر محمداکرم خپلواک هم حضور درلود.
یاده دې وي، چې په دغه غونډه کې د سرحدونو او قبایلو وزارت د جرګو د همغږۍ مرستیال محمدیعقوب احمدزي، محمداسماعیل قاسمیار او ډاکټر عبدالرحیم پښتونیار، په سیاسي چارو کې د ولسمشر ځانګړي استازي ډاکټر محمداکرم خپلواک او نورو مخورو ګډون کړی و.
