حکومتي سرچینې وايي، د سهشنبې په مازیګر د لغمان ولایت بادپښ ولسوالۍ کې د ختیځې حوزې برېښنا شرکت ۱۴ کارکوونکي وسلهوالو داسې مهال برمته کړي چې یادې سیمې ته د برېښنا مزو په تړلو پسې تللي وو.
څه کم دوې اوونۍ کېږي چې ننګرهار او لغمان ته د نغلو ورغلې برېښنا د لغمان په بادپښ کې پرې شوېده.
یوې سرچینې د نوم او غږ نه خپرولو په شرط سلام وطندار ته وویل، برمته شويو څوارلسو کسانو کې انجینیران، فني کارګر او موټرچلوونکي شامل دي.
د لغمان چارواکي وايي، هڅه کوي چې برمته شوي کسان ژر تر ژره د وسلهوالو له منګولو وژغوري.
وړمه ورځ د لغمان ولایت رسنیز دفتر یوې خبرپاڼه کې ویلي وو چې د بادپښ سیمې خلکو سره د برېښنا د وصل په اړه تفاهم ته نهدي رسېدلي او دوی به پرې نظامي عملیات وکړي.
د سهشنبې په مازیګر د یاد ولایت ویاند اسدالله دولتزي خبر ورکړ چې بادپښ کې یې له ځايي خلکو سره ستونزه حل کړي او ژر به برېښنا وصل شي؛ خو د برېښنا ډلې رسېدو سره سم ورغلی ټیم د وسلهوالو له لوري برمته شو.
تر اوسه طالبانو یا کومې بلې ډلې پهدې اړه څه نهدي ویلي.
داسې راپورونه هم ورکړل شوي وو چې بادپښ کې ځايي وسلهوال له حکومته د برېښنا د وصل په بدل کې پیسې غواړي؛ خو حکومتي سرچینو پهدې اړه څه نهدي ویلي.
د دې برېښنا د پرې کېدو له امله د ولسي وګړیو تر څنګ ننګرهار کې لسګونه صنعتي فابریکې هم په ټپه ولاړې دي.
