هرات ولایت کینگشینینگ رییسی، تجارت وزیری همده مذکور ولایتنینگ ایریم سرمایه یاتقیزووچیلری حضوریده مملکت وزیرلری وعدهلریگه وفا قیلمهگن لیکلری بارهسیده ایتیشیچه، حکومتنینگ بلند مرتبهلی رسمیلری دولت ایشلریگه اصلاحات و انتظام کیلتیریش اوچون دایم هرات اهالیسیگه وعده بیرگن لر، لیکن هیچ بیر زمان اوز وعدهلرگه عمل قیلمهگنلر.
مذکور اظهاراتلر تجارت وزیری هرات ولایتیگه سفر قیلگنده تیلگه آلینگن. تجارت وزیری همایون رسا مملکتده گاز نرخی یوقاری کیتیشی همده ملی تاجرلر و سرمایه یاتقیزووچیلرنینگ معماسینی تیکشیریش نیتده اوتگن کون هراتگه سفر قیلگن.
هرات ولایت کینگشی نینگ باشلیغی کامران علیزایی تجارت وزیری بیلن بولگن ییغینده حکومتنی توجهسیزلیک و کم کارلیککه عیبلهگن. اونگه کوره، حاضرگی کونده یاقیلغی مادهلر صادر قیلیووچی ایریم شرکتلر حکومت بلند مرتبهلی رسمیلری حمایتی بیلن «تیل معافی» نامی آستیده مالیه بیرمسدن تیلنی مملکتگه آلیب کیره دیلر. اما، تجارت وزیرلیگی هنوزگچه بو مسالهگه بی فرق یاندهشگن. جناب علیزایی «فردس» شرکتینی فسادگه قولی بولگن شرکت اولهراق تیلگه آلگن. اونگه کوره، مذکور شرکت آیسافنینگ کیسکین حمایتی بیلن جاری ییل باشیدن بیری «تیل معافی» نامی آستیده مملکتگه یاقیلغی مادهلر کلتیرهدی.
هرات ولایتی رسمیلرینینگ مذکور سوزلری سونگی ایکی هفتهده حکومتنینگ اوچ وزیری اوشبو ولایتگه سفر قیلیب بیرگن وعدهلری عملی بولمهگن بیر پیتده ایتیلماقده.
هرات ولایتینینگ ایریم سرمایه یاتقیزووچیلری ییغینده اشتراک قیلیب حکومتنینگ ایکی تامانلمه یاندهشیشی و ینه سرمایه یاتقیزووچیلرنی معماسینی حل ایتمهگنلیکده عیبله گنلر.
هرات سرمایه یاتقیزووچیلری نمایندهلیگیده سوزلهگن ولایت صنعتچیلر بیرلشمهسینینگ رییسی حمیدالله خادمگه کوره، سرمایه یاتقیزووچیلر اون ییلدن بیری نیچه مرته سرمایه یاتقیزیش توغریسیده بولگن قیین چیلیکلرینی حکومت رسمیلری جملهدن جمهور رییس گه ییتکزیگنلر، اما هنوزگه بو معمالر حل ایتیلیشی اوچون هیچ کیم اعتبار بیرمه گن.
هرات اقتصادی وضعیتی بارهسیده سوزلهگن جناب خادم، هرات صنعتی موقعیتی، اقتصادی و امنیتی بوزیلیشی اوچون آلدیندن برنامه توزیلگن لیگینی ادعا قیلگن.
صنعتی شهرک نینگ تورتینچی فازی ترقه تیلمهگنی، باجخانه تعرفهسی یویاری کیتگنی، نابرقرارلیک، مملکتده سرمایه یاتقیزیش اوچون مناسب زمینه بولمهگنی صنعتچیلر اویوشمهسی رییسی نینگ تیلگه آلگن موضوعلریدن حسابلنهدی.
مملکت تجارت و صناعت وزیری محمد همایون رسانینگ سرمایه یاتقیزووچیلرگه ایتیشیچه، بو توغریدهگی بوتون قیینچلیکلر حل ایتیلیشی اوچون حکومت بنیادی لایحه قولگه آلگن. جناب رساگه کوره، تجارت و صناعت اوچون ملی بیر لایحه اوسیتیده ایش آلیب باره دیلر. شونینگدیک تجارت وزیری سرمایه یاتقیزووچیلردن تجارت ساحهسیده استه – سکین اساسی اوزگریش کیلیشی کوتیشینی سورهگن.
