نورستان ولایتینینگ وایگل ولسواللیگی بوگون ایرتهلب قوراللی طالبلر تامانیدن تصرف ایتیلدی. ولایت امنیه قوماندانی خلیلالله ضیایینینگ سلاموطندارگه بیلدیریشیچه، مذکور ولسواللیک بوگون ایرتهلب ساعت 5ده طالبلر قولگه اوتگن.
جناب ضایی، جنگری طالبلر توننینگ یریمیده اوشبو ولسواللیکنی تصروف قیلیش نیتده ملی کوچلر بیلن قتیق اوروش آلیب بارگندن سونگ، وایگلنی اوز تصروفلریگه آلیشگه موفق بولگنلیکلرینی ایتگن.
نورستان سابق ولایت کینگشینینگ باشلیغی قاضی عنایتالله مذهبیار، جنگده هنوزگچه ملی پولیس کوچلریدن 50 نفر قربان بولگنلیگینی بیلدیرگن.
عین حالده، ولایت کینگشینینگ باشلیغی انجنیر سعدالله نینگ سوزلریگه کوره، ولسواللیکده ییرلشگن ملی کوچلرنینگ کوپچیلیگی جنگریلر تامانیدن گروگه آلینگن. اونگه کوره، حکومت هوادن عملیات اوتکزمهگن حالده، ملی کوچلر اولدیریلیشی ممکن.
نیچه کوندن بیری مذکور تومنده جدی شکلده جریانی بولگن اوروش نهایتده کیچه ولسواللیک قوراللی طالبلر تصروفیگه اوتیشگه سبب بولدی. اوتگن کون دولت رسمیلری قوراللی طالبلرنینگ 10 نفری اولدیریلیشی بیلن اوروش پایانیگه ییتگنلیگینی ایتگن ایدیلر. وایگل ولسوالی رحمتالله رحمت طالبلر مذکور ولسواللیکدن آرته چیکینتیریلگنلیگینی ایتگن ایدی.
