هند ته د اوباما سفر د هند او پاکستان اړیکي لا ترینګلې کوي
د امریکا د متحده ایالاتو ولسمشر بارک اوباما د روانې زېږېدېزې میاشتې په(۲۶مه) هندوستان ته سفر وکړ.
د امریکا ولسمشر بارک اوباما د هندوستان له لومړي وزیر نریندر مودي سره د هندوستان پر پیاوړتیا، تعلیمي پرمختګ او نورو اړخونو خبرې وکړي او ويې ویل چې په هند کې به څلور میلیارده ډالره پانګونه وکړي.
همدا ډول امریکا او هندوستان د اټومي همکارۍ پر سر موافقه وکړه.
پاکستاني چارواکي وايي چې د امریکا او هند ترمنځ د اټومي معاهدې اړوند څرګندونې د جنوبي اسیا وضعیت اغېزمن کولای شي.
د پاکستان د وزیر اعظم د بهرنیو چارو سلاکار سرتاج عزیز په خپلو څرګندونو کې ویلي، چې د هند او امریکا تر منخ اټومي معاهده به د جنوبي اسیا توازن بې اغېزې پرې نه ږدي.
سرتاج عزیز په هند کې د امریکا د ولسمشر بارک اوباما د څرګندونو په ځواب کې وویل، چې پاکستان د خپلو ملي ګټو د خوندیتوب حق لري.
نوموړي زیاته کړې، چې دوی له امریکا سره د ښو اړیکو غوښتونکي دي او له امریکا د جنوبي اسیا په ستراتيژيکه برخه کې د تعميري رول تمه لري.
ځینې سیاسي کارپوهان پر دې اند دي، چې چین له پاکستاني چارواکو سره په نږدې کېدو، امریکا غواړي له هند سره خپلې اړیکې ټینګې کړي.
د دوی په نظر له هندي چارواکو سره د امریکا غښتلې اړیکې به په سیمه کې بې اغېزې نه وي او ښايي په افغان سوله هم ژورې اغېزې وکړي.
د نړیوالو اړیکو شنونکی جمال الدین بدر وايي، امریکا ځکه له هند سره د اړیکو جوړولو لپاره مټې را بډ وهلې، چې پاکستان د امریکا د ګټو لپاره نور هغه رول نه شوای لوبولی، چې د روسانو پروړاندې یې د افغان جګړې په وخت لوبولی و.
بدر سلام وطندار سره په خبرو کې وویل، چې پر دې سربېره ځینې نور علتونه هم شته، چې امریکا د پاکستان په پرتله هندوستان ته ارزښت ورکړ، هغه وايي: « هندوستان د غرب لپاره یو ښه بازار او یوه لویه منبع ده، هغه هېواد چې زر ملیونه نفوس لري له یو سل اویا میلیونه نفوس لرونکي هېواد سره د پرتلې وړ نه دی. پر دې سربېره غرب له چین سره په سیالۍ کې دی، چې هېواد د چين په لاره کې نسبي خنډ کېدای شي. »
جمال الدین بدر زیاتوي، چې هند ته د امریکا د متحده ایالاتو د ولسمشر ورستی سفر د پاکستان له پاره د خطر زنګ دی.
بدر وايي: « هندوستان ته د اوباما سفر د پاکستان لپاره د خطر زنګ دی، چې پاکستان باید یو بدیل پیدا کړي او یاهم خپلو کړنو ته پام وکړي.»
د نړیوالو اړیکو شناند جمال الدین بدر د ورستيو بدلونونو په اړه په دې نظر دی، چې دا نه یواځې د هند او پاکستان په اقتصادي اړیکو اغېز لري، بلکې په سیمه کې په امینتي وضعیت هم بې اغېزې نشي پاتې کېدای.
نوموړی وايي چې د روسانو له وتلو وروسته د پاکستان په اړه د امریکا پالیسې یو ۱۸۰ درجې بدلون وکړ، ځکه چې نور پاکستان هغه رول نشوای لوبولای، لکه د افغان – روس په جګړه کې يې چې د امریکا د ګټو لپاره ولوباوه.
هند ته د امریکا دولسمشر په ورستي سفر کې چې د جنورۍ په ۲۵ مه پېل شوی و دیو لړ همکاريو معاهدې هم لا سلیک کړي او اوباما په ښکاره دملګرو ملتونو دامنیت شورا کې دهندوستان د دایمي غړیتوب دمرستې اعلان وکړ او هندوستان یې په سیمه کې دخپل باوري ملګري په توګه یاد کړ.
