افغان پوځي لوړ پوړي چارواکي وايي، چې دوی د افغانستان هلمند ولایت په نادعلي ولسوالۍ کې بریالي عملیات کړي.
دوی پر وسلهوالو طالبانو د خپلو پوځي عملیاتو د بریالي کېدو لوی راز په نوۍ ټکنالوژۍ سمبالې وسلې بولي.
دغه عملیات، چې ۶ ورځې وړاندې د نادعلي ولسوالۍ د لاسه وتلو سیمو د بیرته نیولو په موخه پیل شوي و نن د یادې ولسوالۍ مرکز له لښکرګاه ښارسره وصل شو.
د ۲۱۵ میوند قول اردو مرستیال جنرال عبدالهادي رسنیو ته وویل، چې دوی د نوې ټیکنالوژي څخه ګټه اخیستي، ترڅو ملکي تلفاتو څخه هم مخنیوی شوی وي.
نوموړی وايي، چې پهدې عملیاتو کې يې د "سکین اګن ډرون" استخباراتي معلوماتو او یو شمیر نورو سپکو اودرنو اسلحو نه چې موډرنې ټکنالوژي پکې کارول شوې ګټه اخیستې ده.
د ده پر وینا، تر۱۲۸ زیات وسلهوال طالبان وژل شوي او لسګونه میله سپکې او درنې اسلحې د افغان ځواکونو لاس ته لویدلې دي.
هغه وایي، په دغو عملیاتو کې افغان ځواکونو ته کوم زیان نهدی اوښتی.
د ۵۰۵ بست زون سرپرست قوماندان عبدالرحیم چخانسوري وایي، د افغان ګډو ځواکونو ترمنځ ښه همغږي د دې بیلګه ده چې هرڅه بریالي ترسره شول، چې زیاته برخه د دې عملیاتو پولیس تشکیلوي.
د هلمند والي حیاتالله حیات وایي، چې وسلهوال یې سخت ځپلي او د هغوی مهم قوماندانان یې لهمنځه وړي او د نورو سیمو د بیا نیولو لپاره یې تابیا نیولې ده.
له تیر یوه کال راهیسې دا په هلمند کې لمړني پوځي عملیات دي، چې د نوې ټیکنالوژي خبره پهکې کيږي، چې افغان ځواکونه یې د یوشمیر سیمو د نیولو په موخه پیل کوي او تردې دمه یې یواځې نادعلي ولسوالۍ تر خپلې ولکې لاندې بیرته راوستلې ده.
د ویلو ده، چې د تلفاتو او د عملیاتو په اړه تر اوسه وسلهوالو طالبانو څه نهدي ويلي.
