د ولسي جرګې په نننۍ استجوابیه غونډه کې د سوداګرۍ او صنایعو وزیر، د افغانستان بانک لوی رییس او د ماليې وزارت معین استجواب شوی وو، څو د بهرنيو اسعار پر وړاندې د افغانۍ د نرخ ټيټېوالي او سون توکو د بيو لوړېدو په اړه د وکيلانو پوښتنې ځواب کړي.
په دغه غونډه کې د سوداګرۍ او صنایعو وزیر همایون رسا وویل، چې د ګاز واردات د ترکمنستان هېواد پورې اړه لري او یاد هېواد له تېرې يوې میاشتې راهیسې د خپلو فابريکو په پاکولو اخته وو، نو له همدې امله د ګاز واردات هم بند شوي وو.
هغه وايي، چې له ۴ ورځو وروسته به له ترکمنستان څخه د ګازو پر وارداتو پېل وکړي او په دې سره به په ټول افغانستان کې د ګازو بيه ټيټه شي.
د همایون رسا په خبره اوسمهال په کابل ښار کې یو د کیلو ګرام ګازو بیه ۵۵ افغانيو ته راټيټه شوې او په وينا يې له دې به هم راټيټه شي.
د سوداګريو او صنایعو وزیر وویل، چې د ۱۵۰ زرو ټنو ګازو تړون له اذربایجان هېواد سره لاسلیک شوی او له روسيې سره به هم ۷۲ زرو ټنو نورو تړون هم لاسلیک شي، چې ترکمنستان به هم د تړون کوونکو په ډله کې و شمېرل شي.
همدارنګه د راپورونو له مخې افغان حکومت په پام کې لري، چې په راتلونکو څو میاشتو کې د اقينې او تورغنډي په بندرونو کې د ګازو پایپ لاین و غځوي او دا چاره به هم د ګازو په نرخ کې ټيټوالی راوړي.
په غونډه کې د افغانۍ د بيې ټيټوالي په اړه د افغانستان بانک لوی رییس خلیل صدیق ځوابونه د ولسي جرګې مشر په وړاندیز او د وکيلانو له لوري له منلو وروسته د خبریالانو په نه شتون کې د تړلو دروازو تر شا وویل شول.
خو د ولسي جرګې غړي خالد پښتون سلام وطندار ته وویل، چې د افغانستان بانک د لوی رییس ځوابونه تر ډېره د وکيلانو د قناعت وړ وو.
د ويلو ده، چې تېره اوونۍ د نفتي توکو رییس د مشرانو جرګې غړو ته وویل، چې د ګازو په بیه کې به ۸ افغانۍ ټيټوالی راشي.
په پام کې ده، چې افغانستان د روان کال په ډسمبر میاشت کې د نړېوال سوداګریز سازمان غړيتوب ترلاسه کړي، چې دغه غړيتوب به د افغانستان د سوداګرۍ په برخه کې خورا ګټور تمام شي.
