بوگون (دوشنبه) لشکرگاه شهرینینگ 2 مینگگه یقین یشاوچیسی ولایت مرکزیده ییغین اوتکزیب ملی بیرلیک حکومتیدن اوز حمایتلرینی اعلام قیلگنلر.
اولر جمهور رییسدن، نظام ایچیده بولهتوریب، نظامدن انتقاد قیلهدیگنلرنی عدلی و قضایی نهادلرگه معرفی قیلیشینی طلب قیلگنلر.
یشاوچیلر مملکتده ینگی یوزهگه کیلگن ایتلافلرنی بحرانگه زمینه یرهتووچی دیب بیلهدیلر.
هلمند یاش اولوغلریدن بیری فقیرمحمد عسکرنینگ ایتیشیچه، هلی یشاوچیلر هوشیار بولگن و حکومت بیلن یشاوچیلر اورتهسیده فاصله کیلتیره دیگنلرگه اجازه بیرمهیدیلر.
اونگه کوره، هلمندده اوروش دوام ایتیب تورگن بولسه هم، تشقلریدن کیلیب ایشلهدیگنلرگه نفاق تشلش اوچون ایریم ایتلاف توزهتیشگه رخصت بیرمهیدیلر.
هلمندنینگ مدنی فعاللریدن بیری سردارمحمد همدردنینگ ایتیشیچه، بوندن بویان کابلدهگیلر اولرنینگ اسمیدن امتیاز آله آلمیدی.
اونگه کوره، حاضرگی یشاوچیلر اوتمیشلردیک ایمس و بولر اوزلری تصمیم آلهدی.
شونینگدیک هلمند ولایتینینگ ولایتی کینگش اعضاسی بشیراحمد شاکر، ملی بیرلیک حکومتیدن حمایت قیلیش یانیده، حکومتدن یخشی حکومتدارلیک اوچون اوشبو ولایت محلی ادارهلریگه صلاحیت بیریشلرینی سورهدی.
او، ینگی تشکیل ایتیلگن ایتلافلرنی تنقیدلب ایتیشیچه، جمهور رییس غنینینگ تشقی علاقهلری موفقلیگی نظام ایچیدهگی ایرم شخصلرگه تشویش تاپدیرگن و شو اوچون ایتلاف توزهتیشلری بیلن حکومتگه باسیم کیلتیرهدیلر.
نیچه آیدن بیری هلمند ولایتینینگ کوپلب منطقهلری طالبلر تصرفیگه اوتیشیگه قرهمهی ولایت یشاوچیلری ملی بیرلیک حکومتیدن اوز حمایتلرینی اعلام قیلهدیلر.
