د هلمند ولایت د پوهنې مسوولین وايي، چې په دغه ولایت کې ناامنیو د ۱۲م ټولګي پر فارغانو منفي اغیز کړی، چې له امله يې سلګونه کسان نه شي کولی د کانکور په ازموينه کې ګډون وکړي.
د هلمند د ښوونې رییس عبدالمتين جعفر وايي، چې دې ولايت کې له تيرو څو مياشتو راهيسې د ناامینو د زیاتېدو له امله يوشمير سيمو کې ښوونځي تړل شوي او ډير زده کوونکي له زده کړو هم محروم پاتې شوي دي.
د جعغر پر خبره، سږکال له هلمنده ٢٥٦٨ تنه له دولسم ټولګي څخه فارغ شوي و، چې ٤٥٠ يې يواځې ښځينه زده کوونکي په کې شاملې وې.
د نوموړي پر خبره، اوس له دې جملې یواځې ۱۰۶۲ کسانو د کانکور ازموینې له پاره نوم لیکنه او پاتې نور يې د نا امنيو له امله له زده کړو بې برخې پاتې دي.
د هغه پر وینا، که چيرې د تيرو کلونوپه پرتله امنيت ښه وای ښايي پاتي ١٥٠٠ تنه کسانو هم د کانکورپه دې ازموينه کي ګډون کړي وای.
هلمند کې ټولې ٣٢٥ ښوونځي د ښوونې رياست په چوکاټ کي شامل دي، خو له دې ښوونځيو نه يي تر١٥٠ زياتې تړلي پاتې دي.
د معارف رياست وايي، په يوشمير سيمو کې يي اوس تړلي ښوونځي د وسله والو طالبانو له لوري خلاص کړي او زده کوونکو له پاره يې د زده کړې زمينه برابره کړې ده.
په همدې حال کې د لوړو زده کړو وزارت له لوري هلمند ته د پوهاند اسدالله امینزايي په مشرۍ یو ۳۵ کسیزه پلاوی هم لېږل شوی، چې دنده يې د کانکور له ازموينې څارنه ده.
اسدالله امینزايي سلام وطندارته وويل، چې دوی هڅه کوي د نورو کلونو په پرتله په دې ولايت کې د ازموينې پرمهال د درغليو مخه ونيسي.
هغه وايي، يو زر او دوه شپيته کسانو د ازمويني له پاره نوم ليکنه کړې، چې ٧٦ يې په کې ښځينه دي.
د ده پر خبره، چې د ټولو زده کوونکو ازموين پاڼې بيلې او سوالونه يي هم یو له بله سره توپير لري.
هغه وايي، د ولسمشر له لوري ورته امر شوي، ترڅو شفافې ازمويني ترسره کړي او د درغليو مخه ونيسي.
نوموړی وايي، هرڅه بريښنايي شوي او لاسوهنه په کې له امکانه لرې خبره ده.
بل لوري ته د هلمند والي ميرزاخان رحيمي هم دا مني، چې نا امنيو ښايي ډير لږ کسان د کانکور له ازموينو راګرځولي وي.
د هلمند والي وايي، د ازموينې په دې برخه کې، چې هلمند کې اخيستل کيزي په لوړه کچه د درغليو مخه نيول شوې ده.
هلمند کې داسې مهال د کانکور ازموينې له پاره په کمه کچه ځوانانو نوم ليکنه کړې، چې تيرکال شاوخوا١٥٠٠ کسانو په دې ولايت کې د لوړو زده کړو له پاره ازموينه ورکړله، چې د دغې شمېرې شاوخوا٨٠٠ تنه يي لوړو زده کړو ته يې لاره موندلې وه.
