هلمند ولایتی‌نینگ یاشلریدن بیرقطاری، نیچه وقت آلدین حکومت و دولت گه قرشی قوراللی عصیانچیلردن آتش کیسین اعلان قیلیب و تینچلیک‌نی تأمین قیلیش‌لری اوچون تینچلیک خیمه قورگن ایدیلر و اولر ایستک‌لری عمل‌گه آشیریلیشی اوچون اوتگن کون کیچ قورون پیاده کابل تامان یول آلگن‌لر.
اولرنینگ ایتیشیچه، مملکت‌نینگ بوتون ولایت‌لریگه سفر قیلیب و اوروش‌گه قرشی پیاملرینی مملکت‌نینگ باشقه یشاوچیلری گه هم ییتکیزه‌دیلر.
هلمند یاشلریدن بیری اقبال خیبرنینگ سلام وطندارگه ایتیشیچه، اوتگن هفته اولر 4 ماده‌لیک بیر شرطنامه یوللب اوروش تامانلریدن مملکت‌ده اوروش گه نقطه قوییش‌لرینی سوره‌گن؛ بیراق حاضرگچه جواب آلمه‌گن‌لر.
روزه آیی‌ده آتش کیسین اعلان قیلینیشی، اوروش تامانلری آره‌سیده سوزلشوولر باشله‌نیشی، ملی و اسلامی ارزشلر اساسیده، تینچ بیر تیزیم ایجاد ایتیلیشی اوچون عملی ایش باشله‌نیشی و افغانستاندن چیت ایللیک کوچلرنینگ چیقیش زمانی تعیین ایتیلیشی هلمند یاشلری‌نینگ ایستک‌لری بولگن.
عین حالده، هلمند مدنی فعاللریدن بیری زلمی، یاشلرنینگ بو حرکتی‌نی مملکت‌ده تینچلیک تأمین‌لنیشی اوچون اونملی بیر آدیم دیب بیله‌دی. اونینگ کوپه‌یتیریشیچه، مدنی فعاللر، هلمند یاشلری‌نینگ بو حرکتی‌دن حمایت قیله‌دی.
کمیده ایکی آی آلدین، لشکرگاه شهریده بیر پارتلش یوز بیردی و نتیجه‌ده 18 کیشی هلاک و باشقه 35 کیشی یره‌لندی. بو پارتلش‌گه عکس‌العمل بیلدیریش اوچون هلمند یاشلری تینچلیک سوره‌ش خیمه قوریب و اوروش تامانلریدن اوروش گه نقطه قوییش‌لرینی سوره‌دی.
