هلمند ولایتینینگ مدنی فعاللری، مملکت جنوب زونینینگ ینگیدن تعین ایتیلگن 505- پولیس قوماندانی عصمتالله دولتزایینی پاره خورلیکده قولی بارلیککه عیبلهگنلر. مدنی فعاللر بوگون بیر خبری انجمن اوتکزیب جمهور رییسدن مذکور قوماندان ایشدن آلینیشنی سورهگنلر.
ییغینده اشتراک قیلگن هلمند مدنی جماعهچیلیک فعاللری رییسی سردارمحمد همدرد، جمهور رییس اشرفغنی مملکت جنوب زونی 505 قوماندانلیگی اوچون جناب دولتزایینی تعین ایتیشده خطا قیلگن دیگن. اوشبو قومانداننی کوچسیزلیک همده کفایتسیزلیککه عیبدار بیلگن جناب همدردگه کوره، حاضرگی شرایطده جناب دولتزایینینگ جنوب حوزسیگه قوماندان ایتیب تیعنلهنیشی مذکور ساحهنی تورلی قیینچلیکلرگه دوچار قیلهدی.
هلمند مدنی جماعهچیلیک فعاللری، پاره خورلیکده قولی بولگن کیشیدن هیچ بیر زمان امنیتنی تامین قیلیشنی کوتمسلیک کیرهک دیگنلر. اولرگه کوره، ولایت وضعیتی نظرده توتیلگن حالده، متخصص خوفسیزلیک رسمیلری تعین ایتیلیشی شرط.
ولایتنینگ مدنی فعاللری همده یازووچیلریدن جناب محمد قرشینینگ سوزلریگه کوره، جمهور رییس غنی ولایت خلقینینگ مصلحتی اساسیده باشقه بیر قومانداننی جنوب زونی 505- قوماندانلیگی اوچون تعین لهشی لازم.
سلام وطندار بیلن تیلفونی صحبت قیلگن عصمتالله دولتزایی برچه عیبلاولرنی رد قیلیب، کمینهنینگ پارهخورلیککه قولی بولگن لیگینی اثباتلاووچی حجت اعتراضچیلر اختیاریده بولگن حالده، عدلی و قضایی ادارهلرگه تاپشیریشنی بیلدیرگن. عین حالده، هلمند امنیتی وضعیتی بارهسیده خواطر بیلدیرگن دولتزایی، ولایت بویلب امنیت تامین ایتیلیشی اوچون معین برنامهسی بولگن لیگینی تیلگه آلگن.
اوتگن کون جمهور رییسنینگ فرمانی اساسیده جنوب زونی 505- قوماندانی عصمتالله دولتزایی قوشیمچه، پولیس ساحهوی زونلر قوماندانلری جملهدن آسمایی 101 زون اوچون عبدالرحمن رحیمی، شمشاد 202 قوماندانلیگی اوچون جورهبیک، سپینغر 303 قوماندانلیگی اوچون اسدالله شیرزاد، میوند 404 زونی اوچون معشوق احمد سیلاب، 606 زون قوماندانلیگی اوچون حسنشاه، پامیر 707 زون لوازمی اوچون میر امانالله گذر و قندوز 808 زونی اوچون شیرعزیز کامهواللر تعین ایتیلگنلر.
