هلمند و قندهار یشاوچیلری نینگ ایتیشیچه، امنیتی کوچلر و طالبان آرهسیده یوز بیرهدیگن اوروش جریانیده کجکی برقی نینگ لینی بیر کون ایچیده ایکی مرته هم اوزیلهدی و بو وضعیت اولرنی جوده هم زیریکتیرگن.
اولرنینگ ایتیشیچه، ایریم پیتلر برق نینگ اوزیلگن لینی و ییقیلگن پایهلری تیزلیککه باغلنهدی، بیراق کوپینچه پیتلر نیچه کون برق بولمهیدی و اوشبو ایکی ولایت یشاوچیلری نینگ ایش و کوچلری گه زیان ییتکیزهدی.
هلمند و قندهار یشاوچیلری، برق ریاستی نینگ مسؤوللریدن بو قیینچیلیک حل ایتیلیشی توغریسیده اساسی بیر ییچیم یول تاپیشینی سورهیدی.
بیراق، هلمند ولایتی بوییچه برق ریاستی مسؤوللری نینگ ایتیشیچه، برق لینی کوپلب امنیتی کوچلر و طالبان آرهسیده یوز بیرهدیگن اوروش ده اوزیلهدی و اوروش دوام ایتگونگهقدر بو قیینچیلیک حل ایتیلمهیدی.
هلمند ولایتی بوییچه برق ریاستی باشلیغی وحیدالله علیزی نینگ ایتیشیچه، اوتگن بیر ییل جریانیده کجکی دن لشکرگاه و قندهارگچه تارتیلگن برق لینی امنیتی کوچلر و طالبان آرهسیده یوز بیرگن اوروش ده چمهسی 200 مرته اوزیلگن.
جناب علیزی نینگ کوپهیتیریشیچه، اولر اوزیلگن برق لینینی تیزلیککه باغلش خصوصیده، حرکت قیلهدی، بیراق ایریم پیتلر امنیتی کوچلر و طالبان مذکور ریاست نینگ ایشلاوچیلری گه لین اوزیلگن محل باریش گه رخصت بیریشمهدی.
ایتیش کیرهک کیم، نیچه وقت آلدین کجکی برقی نینگ لینی تورت بولیم دن اوزیلگن ایدی و مسؤوللرگه کوره، اوچ بولیمی تیزلیککه باغلنگن، بیراق هلمند ولایتی نینگ سنگین تومنی گه تیگیشلی «فتحمحمد پیچ» منطقهسیده اوروش بولگنی باعث، برشنا ایشلاوچیلری اوزیلگن لین نی کمیته ایکی هفته دن کیین باغلهگن.
