هلمند ولایتی‌نینگ محلی رسمیلری مذکور ولایتده قورال‌لی طالب‌لر بیلن داعش اورته‌سیده اوروش یوز بیرگن لیگیدن خبر بیرماقده‌لر. مذکور آتیشمه اوشبو ایکی گروه اورته‌سیده بولگن سابق خصومت‌لردن کیلیب چیققن.
ایتیلیشیچه، توقنشوو جریانیده ایکی تامانگه هم تلفات ییتگن. ایریم شخصلرگه کوره، اوشبو ایکی قورال‌لی گروه اورته‌سسیده یوز بیرگن اوروش نتیجه‌سیده داعش اداره‌سی آستیده بولگن ایریم منطقه‌لر قورال‌لی طالب‌لر تصرفی‌گه اوتگن.
عین حالده، هلمند ولایتیده داعش نینگ قوماندانی ملا رووف بیرینچی مرته اوشبو حرکت نینگ بیرقینی مذکور ولایتده تیکله‌گن ایدی، او، بوندن آلتی آی آلدین خارجی کوچلرنینگ هوادن اوتکزگن عملیاتی عاقبتیده هلاک بولگن ایدی.
هلمند پولیس قوماندانی نبی جان ملاخیل نینگ سوزلریگه کوره، داعش و طالب‌لر حرکتی اورته‌سیده دوشنبه کونی (6- میزان) ده ولایت نینگ کجکی تومنیده روی بیرگن. نتیجه‌ده داعش‌نینگ آلتی اعضاسی نابود بولگن. هنوزگچه اوروش‌ده تن جراحتی آلگن‌لرنینگ سانی انیق ایمس. جناب ملاخیل‌گه‌کوره، اوشبو اوروش‌لرده تشقری قوللر اره‌لشه‌دی.
طالب‌لر همده داعش گروهی اورته‌سیده اوروش یوز بیرگن‌لیگی افغانستان حکومتی منفعتی گه بولگن لیگینی ایتگن جناب ملاخیل گه کوره، مذکور توقنشوولرده تینچ اهالی‌گه هم تلفات ییتگن.
حادثه‌نی تصدیقله‌گن هلمند ولایت کینگشی نینگ اعضاسی عبدالمجید آخندزاده، ایکی تامان هم شهردارلیک و نقله واسطه‌لر اداره‌سی درآمدی اوستیده کیلیشمی نتیجه‌ده اوروش یوز بیرگن دیگن. ایتلیشیچه، اوروش نتیجه‌سیده قورال‌لی طالب‌لر داعش نی منطقه‌دن چیقاریب اوشبو منطقه‌نی اوز تصرف لریگه آلگن‌لر.
عین حالده کجکی ولسوال‌لیگی‌نینگ قطار یشاووچی‌لریگه کوره، نیچه آیدن بیری داعش نینگ فعالیتی مذکور منطقه‌دن آشگن. اولرنینگ سوزلریگه قره‌گنده، اوشبو گروه‌نینگ بیرقی ولایت‌نینگ ایریم حدودلریده تیکلنمه‌گن بولسه – ده، اما بو گروه ممعین منطقه‌لرده فعالیب آلیب باره‌دی.
محل یشاووچی‌لری داعش حرکتی بیلن قورال‌لی طالب‌لر اورته‌سیده یوز بیرگن اوروش اوچون شخصی منفعت‌لر سبب بولگن‌لیگی نی ایتگنلر. قاچاقچیلری اوز منفعت‌لری تامین ایتیلیشی اوچون مذکور ولسوال‌لیکده بیر- بیراولریگه قرشی توقنشگن‌لر.
کجکی ولسوال‌لیگی بوندن آلدین هم نیچه مرته دولت قورال‌لی مخالف‌لری بیلن ملی کوچلر اورته‌سیده یوز بیرگن اوروش‌نی گواهی بولگن، لیکن بو بیرینچی مرته دیر داعش بیلن طالب‌لر ارا بو ولسوال‌لیکده جنگ روی بیرگن.
شونینگ‌دیک بوندن نیچه وقت آلدین هلمند ولایتی‌نینگ محلی رسمیلری قورال‌لی طالب‌لر بیلن داعش گروهی بیر- بیراولریگه ضد جهاد فتواسی صادر قیلگن لیکلری توغریسیده حجت بارلیگینی ایتگن ایدیلر. ولی هنوزگچه هم اوشبو ایکی گروه بیر- بیراولریگه قرشی جهادنی رسمن تیل‌گه آلمه‌گنلر.
